साकारण्यात येणारे सभागृह केवळ इमारत नसून पत्रकारांच्या विचारांना, संघर्षाला व स्वाभिमानाला मिळालेली ओळख – आमदार अमोल पाटील

लोकदर्पण पत्रकार सभागृहाचे भूमिपूजन उत्साहात संपन्न

पारोळा | प्रतिनिधी, पारोळा शहरातील लोकदर्पण पत्रकार असोसिएशनच्या गेल्या अनेक दशकांपासून प्रलंबित असलेल्या सभागृहाच्या मागणीला अखेर न्याय मिळाला आहे. आमदार अमोल पाटील यांच्या ठोस आश्वासन व सातत्यपूर्ण पाठपुराव्यामुळे पत्रकार संघाच्या सभागृह बांधकामासाठी २० लाख रुपयांचा निधी मंजूर झाला असून, आज या सभागृहाच्या कामाचे भव्य भूमिपूजन आमदार अमोल पाटील यांच्या हस्ते संपन्न झाले.याच कार्यक्रमात नवनिर्वाचित लोकनियुक्त नगराध्यक्ष चंद्रकांत पाटील तसेच नगरसेवकांचा सत्कार मोठ्या उत्साहात करण्यात आला.या प्रसंगी माजी नगराध्यक्ष गोविंद शिरोळे, लोकनियुक्त नगराध्यक्ष चंद्रकांत पाटील, पारोळा पोलीस निरीक्षक अशोक पवार, ग्लोबल स्कूलचे अध्यक्ष मनोहर पाटील, बाजार समितीचे माजी सभापती विजय सुदाम पाटील, शेतकी संघाचे साहेबराव पाटील, वंजारी गावाचे सरपंच, उपसरपंच, सदस्य व ग्रामस्थ, तसेच नवनिर्वाचित नगरसेवक, शिवसेनेचे आजी-माजी पदाधिकारी, शिवसैनिक, विविध स्थानिक स्वराज्य संस्थांचे आजी-माजी पदाधिकारी, लोकदर्पण पत्रकार असोसिएशनचे पदाधिकारी, सदस्य, पत्रकार बांधव व विविध क्षेत्रांतील मान्यवर मोठ्या संख्येने उपस्थित होते.यावेळी माजी नगराध्यक्ष गोविंद शिरोळे व नवनिर्वाचित नगराध्यक्ष चंद्रकांत पाटील यांनी आपल्या मनोगतात लोकदर्पण पत्रकार असोसिएशनच्या कार्याबद्दल समाधान व्यक्त केले.

कार्यक्रमात बोलताना आमदार अमोल पाटील म्हणाले,

“लोकशाहीचा चौथा स्तंभ असलेल्या पत्रकारांच्या सन्मानासाठी उभारले जाणारे हे सभागृह संविधान, सत्य, निर्भीडता आणि जनतेच्या प्रश्नांचा आवाज अधिक बुलंद करेल. अनेक वर्षांपासून पत्रकार बांधवांनी ही मागणी सातत्याने लावून धरली होती. अनेकांनी केवळ पोकळ आश्वासने दिली; मात्र दिलेला शब्द पूर्ण करून ही मागणी प्रत्यक्षात साकारण्याचे भाग्य मला लाभले, याचे मनापासून समाधान आहे. हे सभागृह केवळ इमारत नसून पत्रकारांच्या विचारांना, संघर्षाला व स्वाभिमानाला मिळालेली ओळख आहे. पारोळा शहराच्या विकासात पत्रकारांचे योगदान मोलाचे असून पुढील काळातही हे सहकार्य असेच कायम राहील.”

जनतेच्या विश्वासावर निवडून आलेल्या नवनिर्वाचित नगराध्यक्ष व नगरसेवकांचा यथोचित सत्कार केल्याबद्दल आमदार पाटील यांनी लोकदर्पण पत्रकार असोसिएशनचे आभार मानले. शहराच्या सर्वांगीण विकासासाठी सर्वांनी एकदिलाने व एकमताने काम करण्याचा संकल्प यावेळी व्यक्त करण्यात आला.हा सोहळा म्हणजे पत्रकारिता, लोकशाही व विकासाचा त्रिवेणी संगम असून, येत्या काळातही लोकदर्पण पत्रकार असोसिएशनच्या कार्यासाठी सदैव कटिबद्ध राहणार असल्याचे मत आमदार अमोल पाटील यांनी व्यक्त केले.या भूमिपूजन सोहळ्याचे प्रास्ताविक लोकदर्पण पत्रकार असोसिएशनचे अध्यक्ष बाळासाहेब पाटील, तर सूत्रसंचालन दीपक भावसार यांनी केले. कार्यक्रमाच्या शेवटी उपाध्यक्ष भूपेंद्र मराठे यांनी उपस्थितांचे आभार मानले.