श्रीराम विद्यालयाच्या विद्यार्थ्यांची विधानभवन व मुंबईतील शैक्षणिक-पर्यटन सहल; लोकशाहीची प्रत्यक्ष ओळख

नगर – प्रतिनिधी, श्रीराम विद्यालय, पिंपळगाव माळवी (ता. नगर, जि. अहिल्यानगर) येथील विद्यार्थ्यांनी नुकतीच मुंबई येथे आयोजित शैक्षणिक-पर्यटन सहल यशस्वीरीत्या पूर्ण केली. या सहलीअंतर्गत विद्यार्थ्यांनी महाराष्ट्राचे विधानभवन, विधानसभा कामकाज, मंत्रालय तसेच मुंबईतील अनेक महत्त्वाची पर्यटन व ऐतिहासिक स्थळे यांना भेटी दिल्या.विधानभवन व मंत्रालयाच्या भेटीदरम्यान विद्यार्थ्यांना लोकशाही व्यवस्था, शासनाची कार्यपद्धती, कायदे कसे बनतात आणि प्रशासन कसे चालते याची प्रत्यक्ष माहिती मिळाली. विधानसभा कामकाज पाहताना विद्यार्थ्यांमध्ये विशेष उत्सुकता दिसून आली. या अनुभवामुळे विद्यार्थ्यांमध्ये नागरिकत्वाची जाणीव, जबाबदारी आणि राष्ट्रभक्तीची भावना अधिक दृढ झाली.या शैक्षणिक सहलीत विद्यालयाचे मुख्याध्यापक श्री. संभाजी पवार, इतर शिक्षकवृंद तसेच सहाय्यक कर्मचारी उपस्थित होते. त्यांनी विद्यार्थ्यांना मार्गदर्शन करत प्रत्येक ठिकाणाचे शैक्षणिक महत्त्व समजावून सांगितले. सहल सुरक्षित, शिस्तबद्ध आणि ज्ञानवर्धक ठरल्याबद्दल पालकांनीही समाधान व्यक्त केले.अशा उपक्रमांमुळे विद्यार्थ्यांचा सर्वांगीण विकास होतो, पुस्तकी ज्ञानाला प्रत्यक्ष अनुभवाची जोड मिळते आणि भविष्यातील जबाबदार नागरिक घडण्यास मदत होते, असे मत विद्यालय प्रशासनाने व्यक्त केले.