सावखेडा होळ येथील जिल्ह्यातील सगळ्यात मोठ्या क्षमतेच्या सोलर पार्कमुळे अनियमित विजपुरवठ्याला कायमचा पूर्णविराम लागणार – आमदार मा. अमोलदादा पाटील

पारोळा : तालुक्यातील ३३/११ केव्ही उपकेंद्र सावखेडा होळ येथे (५+४) मेगावॅट क्षमतेचा सोलर पार्क कार्यान्वित करण्यात आला असून, आज आमदार मा. अमोलदादा पाटील यांच्या शुभहस्ते या सोलर पार्कचे लोकार्पण पार पडले.

यावेळी तालुकाप्रमुख मधुकरआबा पाटील, शेतकी संघाचे मा.संचालक नथाबापू पाटील, शेतकी संघाचे संचालक साहेबराव पाटील, नगरसेवक पंकज मराठे, बाहुटे मा.सरपंच अरुणआबा पाटील, मनोहर पाटील सर, महावितरणचे अधिकारी व कर्मचारी, सावखेडा होळ, सावखेडा मराठ, सावखेडा तुर्कसह पंचक्रोशीतील ग्रामस्थ उपस्थित होते.जळगांव जिल्ह्यातील सर्वात मोठा सोलर पार्क हा आपल्या मतदारसंघात साकारत आल्याचे समाधान मला वाटत आहे. या सोलर पार्कमुळे परिसरातील १९ गावांमधील एकूण ३७९० घरगुती व १६५५ शेतीपंप ग्राहकांना थेट लाभ झाला आहे. याआधी ओव्हरलोडिंगमुळे शेतकरी व नागरिकांना अनियमित विजपुरवठ्याचा सामना करावा लागत होता. सोलर पार्क कार्यान्वित झाल्याने ही समस्या आता कायमची दूर झाली आहे.आमदार मा. अमोलदादा पाटील यांनी सांगितले की, “माझ्या बळीराजाला याआधी रात्री-अपरात्री पाणी भरण्यासाठी शेतात जावे लागत होते. आता शेतकऱ्यांना सकाळी ९ ते सायंकाळी ५ या वेळेत दिवसाचा विजपुरवठा मिळत असून, त्यामुळे अपघातांचे प्रमाण कमी होण्यास मोठी मदत होत आहे.

”या सोलर पार्कद्वारे परिसरातील ग्राहकांना चांगल्या दाबाने व सुरळीत विजपुरवठा होत असून, सध्या दिवसाच्या सुमारे ९० टक्के वीज मागणीची पूर्तता सोलर पार्कमधूनच होत आहे.मतदारसंघात शिक्षण, आरोग्य, दळणवळण यांसह विविध क्षेत्रांत लोकाभिमुख पायाभूत सुविधा उपलब्ध करून देण्यासाठी ठोस विकासदृष्टीकोनातून कामे सुरू असल्याचे आमदार पाटील यांनी नमूद केले. दैनंदिन समस्या सोडवणे, मूलभूत सुविधा पुरवणे, रस्ते व दळणवळण सुधारणे, आरोग्य सेवा बळकट करणे तसेच शाळा, अंगणवाड्या उभारून शिक्षणाचा पाया मजबूत करणे यासह अनेक विकासकामे प्रगतीपथावर आहेत.“यापुढेही मतदारसंघात शाश्वत विकास कसा रुजवता येईल, यासाठी सातत्याने कार्य सुरू राहील,” असे प्रतिपादन आमदार मा. अमोलदादा पाटील यांनी केले.