पारोळा नगरपरिषदेत शिवसेना शिंदे गटाची संघटनात्मक बांधणी; अमृत नाना चौधरी गटनेते

प्रतिनिधी | पारोळा, पारोळा नगरपरिषदेत शिवसेना शिंदे गटाने संघटनात्मक बांधणीला बळ देत महत्त्वाच्या जबाबदाऱ्या वाटपाची प्रक्रिया पूर्ण केली आहे. नगरसेवक अमृत नाना चौधरी यांची गटनेतेपदी निवड करण्यात आली असून, आगामी उपनगराध्यक्ष निवडणूक आणि नगरपरिषदेच्या पहिल्या सर्वसाधारण सभेच्या पार्श्वभूमीवर ही निवड राजकीयदृष्ट्या महत्त्वाची मानली जात आहे.उपनगराध्यक्ष पदाच्या निवडीपूर्वी शिवसेना शिंदे गटाची बैठक पार पडली. या बैठकीत सर्व नगरसेवकांच्या एकमताने अमृत नाना चौधरी यांची गटनेतेपदी, पंकज मराठे यांची उपगटनेतेपदी तर नितीन सोनार यांची प्रतोदपदी निवड करण्यात आली. या निवडीमुळे शिंदे गटातील एकजूट अधोरेखित झाली आहे.दरम्यान, येत्या १५ जानेवारी रोजी पारोळा नगरपरिषदेची पहिली सर्वसाधारण सभा होणार आहे. याच सभेत स्वीकृत नगरसेवक पदासाठी निवड प्रक्रिया पार पडणार असून, सभेच्या अध्यक्षस्थानी लोकनियुक्त नवनिर्वाचित नगराध्यक्ष चंद्रकांत पाटील असणार आहेत.सकाळी ९:३० ते ११:३० या वेळेत उमेदवारांना नामांकन अर्ज सादर करावे लागणार असून, दुपारी १२ वाजता निवडीची अधिकृत घोषणा केली जाणार असल्याची माहिती मुख्याधिकारी तुषार नेरकर यांनी दिली.

याचवेळी स्वीकृत नगरसेवकांची नावेही जाहीर केली जाणार आहेत.दरम्यान, जळगाव येथील जिल्हाधिकारी कार्यालयात निवड प्रक्रिया पूर्ण झाल्यानंतर एरंडोल–पारोळा मतदारसंघाचे आमदार अमोल पाटील आणि नगराध्यक्ष चंद्रकांत पाटील यांनी नवनिर्वाचित पदाधिकाऱ्यांचा सत्कार करून अभिनंदन केले.या प्रसंगी लोकनियुक्त नगराध्यक्ष चंद्रकांत पाटील, नगरसेवक प्रमोद कासार, नजीरखान बेलदार, भूषण टिपरे, नगरसेविका किरणताई पाटील, कविताताई मिस्तरी, पल्लवीताई जगदाळे, भाग्यश्रीताई अनुष्ठान, हमीदा बी. शेख, माजी उपनगराध्यक्ष दीपक अनुष्ठान, माजी नगरसेवक मनोज जगदाळे, मनीष पाटील, विनोद वाणी, जुबेर शेख, मोहम्मद पठाण, दिलीप पाटील यांच्यासह शिवसेना शिंदे गटाचे एरंडोल–पारोळा तालुक्यातील अनेक पदाधिकारी व कार्यकर्ते मोठ्या संख्येने उपस्थित होते.