पारोळा – प्रतिनिधी : येथील नगरपालिकेच्या पाणीपुरवठा विभागातील विद्युत पंप नादुरुस्त झाल्यामुळे प्रभाग क्रमांक ११ मध्ये गेल्या आठ दिवसांपासून पाण्याची तीव्र टंचाई निर्माण झाली होती. नागरिकांना मोठ्या अडचणींना सामोरे जावे लागत असताना या समस्येकडे नव्याने निवडून आलेले नगरसेवक विवेक पतंगराव पाटील यांनी स्वतः लक्ष घातले.प्रभागातील नागरिकांची गैरसोय लक्षात घेता नगरसेवक विवेक पाटील यांनी कोणत्याही औपचारिकतेकडे न पाहता स्वतः पुढाकार घेत कपडे काढून विद्युत मोटर दुरुस्तीसाठी प्रत्यक्ष काम सुरू केले. त्यांच्या या कृतीमुळे नादुरुस्त पंप लवकरात लवकर दुरुस्त झाला असून प्रभाग क्रमांक ११ मधील पाणीपुरवठा पुन्हा सुरळीत करण्यात यश आले आहे.दरम्यान, या संपूर्ण प्रक्रियेत नगरसेवक विवेक पाटील यांना राहुल पवार यांनीही मोलाची साथ दिली. दोघांनी मिळून परिस्थितीचे गांभीर्य ओळखत तात्काळ उपाययोजना केल्यामुळे नागरिकांना दिलासा मिळाला आहे.नगरसेवकांनी दाखविलेल्या या तत्परतेमुळे आणि प्रत्यक्ष श्रमदानामुळे नागरिकांकडून समाधान व्यक्त करण्यात येत असून त्यांच्या कामाचे सर्वत्र कौतुक होत आहे.
