पारोळा | प्रतिनिधी :पारोळा शहरातील नगरपरिषद मालकीच्या व्यापारी संकुलांमधील गाळेधारकांचा गेल्या अनेक वर्षांपासून प्रलंबित असलेला महत्त्वाचा प्रश्न अखेर मार्गी लागला आहे. नगराध्यक्ष, नगरसेवक व मुख्याधिकारी यांच्या उपस्थितीत झालेल्या बैठकीत गाळेधारकांना दिलासा देणारा निर्णय घेण्यात आला.दिनांक ३० जानेवारी रोजी सकाळी ११ वाजता पारोळा नगरपरिषदेच्या सभागृहात आयोजित बैठकीत नगरपरिषद मालकीच्या १८६ व्यापारी गाळ्यांवरील वाढीव भाडेपट्टा आकारणी कमी करणे, करार नूतनीकरण व मुदतवाढ या विषयांवर सविस्तर चर्चा करण्यात आली.या बैठकीस लोकनियुक्त नगराध्यक्ष दादासाहेब चंद्रकांत बी. पाटील, माजी नगराध्यक्ष सुरेंद्र बोहरा, माजी नगरसेवक रवींद्र पाटील, नगरसेवक प्रमोद कासार, मनीष पाटील, भूषण टिपरे, संदेश शिरोळे, बापू मिस्तरी, विनोद पाटील, पवार सर, व्यापारी महासंघाचे उपाध्यक्ष अशोक लालवाणी, मुख्याधिकारी तुषार नेरकर तसेच मोठ्या संख्येने व्यापारी बांधव उपस्थित होते.बैठकीदरम्यान सन २०१९-२० पासून थकीत असलेल्या अतिरिक्त भाडेपट्ट्यात स्थायी निर्देशांनुसार कपात करून, संबंधित गाळेधारकांचे करार नऊ वर्षांसाठी नूतनीकरण करण्याचा निर्णय घेण्यात आला. तसेच करार नूतनीकरण व ट्रान्सफर संदर्भातील प्रलंबित प्रकरणांमध्येही गाळेधारकांना दिलासा देण्यात आला.या निर्णयामुळे व्यापारी वर्ग व नगरपालिका या दोघांचेही हित जपले गेले असून, सर्वानुमते हा निर्णय घेण्यात आल्याने व्यापारी बांधवांमध्ये समाधान व्यक्त करण्यात येत आहे. यावेळी उपस्थित व्यापाऱ्यांनी नगराध्यक्ष, नगरसेवक व नगरपरिषद प्रशासनाचे आभार मानले.
