पारोळा – प्रतिनिधी , इच्छाशक्ती व जिद्द आणि उद्देश निश्चित असला तर यश हे हमखास मिळते. त्याचप्रमाणे शेतकरी कुटुंबातील भावलाल चुडामन पाटील यांच्या दोघां नातींनी आपले ध्येय गाठीत महाराष्ट्र लोकसेवा आयोगाच्या परीक्षेत यश संपादन केले आहे. मोठी बहीण प्रांजल वसंत पाटील ही २०२४ मध्ये घेण्यात आलेल्या महाराष्ट्र कृषी सेवा परीक्षेत कृषी उपसंचालक प्रथम वर्ग या पदावर उत्तीर्ण झाली आहे त्यामुळे तिची क्लास वन ऑफिसर म्हणून निवड झाली आहे तर तिची लहान बहिण मानसी वसंत पाटील ही सुद्धा २०२४ मध्ये घेण्यात आलेल्या महाराष्ट्र कृषी सेवा परीक्षेतून मंडळ कृषी अधिकारी द्वितीय वर्ग (क्लास टू) म्हणून निवड झाली आहे. शेतकरी कुटुंबातून त्यांचे वडील वसंत भाऊलाल पाटील हे देखील आर्थिक अडचणींवर मात करीत स्पर्धा परीक्षांच्या माध्यमातून वनविभागात कार्यरत आहेत.त्यांच्या या यशाबद्दल बोदरडे वंजारी खडके ग्रामस्थांतर्फे तसेच आमदार अमोल पाटील, आमदार अनिल पाटील, बाळासाहेब पाटील आणि राजपूत करणी सेना यांनी त्यांचे अभिनंदन केले आहे.
