पारोळा नगर परिषदेची पहिली जनरल बोर्ड सभा, १३० विषय सह शिलकी अर्थसंकल्प मंजूर

पारोळा – प्रतिनिधी, येथील नगरपरिषदेची सर्व साधारण सभा शुक्रवार रोजी खेळीमेळीच्या वातावरणात १३० विषय आणि वार्षिक अर्थसंकल्प सर्वानुमते मंजूर करून संपन्न झाली. सभेच्या अध्यक्षस्थानी लोकनियुक्त नगराध्यक्ष चंद्रकांत बी. पाटील हे होते. तर प्रमुख उपस्थितीत उपनगराध्यक्ष ॲड. रोहन मोरे व सर्व नगरसेवक होते.▪️ गेल्या पाच वर्षाच्या कालावधीतील विकास कामांची स्पर्धात्मक यादीच नगरसेवकांनी या सभेत ठेवल्याचे दिसून आले. कायदेशीर विकासात्मक कामे असल्याने सर्व विषय सर्वानुमते मंजूर करण्यात आलीत.▪️ १९६.६१ कोटीचा शिलकी अर्थसंकल्प मंजूर…कुठलीही करवाढ न करता सन २०२६ – २०२७ करिता शिलकी अर्थसंकल्प या सभेत सादर करण्यात आला. नगराध्यक्ष चंद्रकांत पाटील, उपनगराध्यक्ष ॲड. रोहन मोरे आणिमुख्याधिकारी तुषार नेरकर यांच्या मार्गदर्शनात, मुख्यलेखापाल दीपक महाजन, लेखा परीक्षक सार्थक मोरसकर यांनी हा अर्थसंकल्प तयार केला असून प्रकल्पाधिकारी चंद्रकांत महाजन यांनी सभेपुढे सादर केला. लोकाभिमुख व विकासाला चालना देणारा अशा या अर्थसंकल्पाचे शहरातून स्वागत करण्यात आले.▪️ हद्दवाढ :-शहराच्या विकासाला चालना मिळण्यासाठी शहराची हद्द वाढ होणे ही काळाची गरज आहे ती गरज ओळखून पारोळा शहराची हद्दवाढ करण्यास या सभेने मंजुरी दिली आहे .▪️ व्यावसायिक…गेल्या दहा वर्षापासून प्रलंबित असलेला व्यवसायिकांचा दुकानांचा प्रश्न या सभेत सर्वानुमते मार्गी लागला आहे. त्यानुसार लागलेले अतिरिक्त व्याज हे कमी करून योग्य रीतीने भाडे नियमित करून, त्याच दुकानदारांना त्यांचे दुकाने नूतनीकरण करून देणे. ज्या दुकानदारांचे दुकाने हस्तांतरण राहिले आहेत, त्यांना ती नियमित करून देणे. या ठरावामुळे शहरातील बाजारपेठेच्या २०० दुकानदारांचा विषय मार्गी लागला आहे.▪️ आजचा मीटिंग भत्ता हा शहरातील अपंग मतिमंद शाळेस द्यावा. असे सर्व २७ नगरसेवक व नगराध्यक्ष यांनी सर्वानुमते ठरवून त्या शाळेत देण्यात मान्य केले. या त्यांच्या उदार धोरणाचेही स्वागत करण्यात येत आहे.▪️ नगरपरिषदेने अंत्यविधीसाठी गौरी व तूप देण्याचे जसे ठरविले आहे तसेच जन्मलेल्या बाळाला बेबी किट देऊन त्याचे स्वागत करायचे देखील ठरविले आहे.एवढेच नाही तर नगर परिषदेने अमरधाम यात्रेकरिता स्वर्गरथ घेऊन नागरिकांना सेवा प्रदान करायची या विषयाला मंजुरी देण्यात आली आहे. सर्व नगरसेवक यांनी एकमताने विकासाच्या दृष्टीने कौल देऊन विषय पारित केले त्यामुळे या सर्वांचे मुख्याधिकारी तुषार नेरकर यांनी अभिनंदन व आभार मानले.