पारोळ्यात भगवान महावीर जन्मकल्याणक महोत्सव उत्साहातभव्य मिरवणूक, सर्वधर्मीयांकडून मंगल आरती; विश्वशांतीसाठी मंत्र पठण
पारोळा (प्रतिनिधी) – “जगा व जगू द्या” हा विश्वमानवतेचा संदेश देणारे जैन धर्मीयांचे २४ वे अंतिम तीर्थंकर भगवान महावीर स्वामी यांच्या २६२५ व्या जन्मकल्याणक महोत्सवानिमित्त सोमवार, दि. ३० मार्च रोजी पारोळा शहरात भव्य मिरवणूक काढण्यात आली. या शोभायात्रेने संपूर्ण शहराचे लक्ष वेधून घेतले.बाल ब्रह्मचारी, शासननायक, उपसर्ग सहन करणारे अहिंसेचे महान पुजारी, वीर, अतीवीर, सन्मती, वर्धमान अशा विविध नावांनी ओळखल्या जाणाऱ्या भगवान महावीर स्वामींच्या विचारांचा जागर या निमित्ताने करण्यात आला.मिरवणुकीदरम्यान शहरातील विविध ठिकाणी सर्वधर्मीय नागरिकांनी एकत्र येत मंगल आरती करून स्वागत केले.
भगवान महावीर जयंती निमित्त सजविण्यात आलेल्या भव्य रथामध्ये महावीर स्वामींची आकर्षक प्रतिमा विराजमान करण्यात आली होती. ठिकठिकाणी भाविकांनी आरती करण्यासाठी मोठी गर्दी केली होती.
अनेक भाविकांनी आपल्या घरासमोरूनच भगवान महावीर स्वामींना वंदन करत श्रद्धा व्यक्त केली. मिरवणूक मार्गक्रमण करत असताना ठिकठिकाणी जयघोषांनी संपूर्ण नगरी भक्तिमय वातावरणात न्हाऊन निघाली.या सोहळ्यात जैन नवयुवक संघ, जैन महिला मंडळ तसेच समाज बांधव व भगिनींचा उत्स्फूर्त सहभाग लाभला. विविध धार्मिक कार्यक्रमांनी वातावरण मंगलमय झाले. मिरवणुकीची सांगता हत्ती गल्ली येथील दिगंबर जैन त्यागी भवन येथे करण्यात आली.