वृक्षारोपण, सिडबॉल्स निर्मिती, “माझी परसबाग” स्पर्धेसह विविध पर्यावरणपूरक उपक्रमांचे नियोजन
पारोळा : पर्यावरण संवर्धन व वृक्षसंवर्धनाच्या उद्देशाने राबविण्यात येणाऱ्या “सिडबॉल्स कॅम्पेन २०२६-२७” या उपक्रमाच्या नियोजन बैठकीचे आयोजन दिनांक १८ मे रोजी धर्मेंद्र शिरोळे सर यांच्या माध्यमातून एन.ई.एस. गर्ल्स हायस्कूल, पारोळा येथे करण्यात आले. बैठकीस शैक्षणिक, सामाजिक व पर्यावरण क्षेत्रातील विविध मान्यवर, शिक्षक, स्वयंसेवक तसेच पर्यावरणप्रेमी मोठ्या संख्येने उपस्थित होते.बैठकीत आगामी तीन महिन्यांसाठी विविध पर्यावरणपूरक उपक्रमांचे नियोजन करण्यात आले. यामध्ये शालेय विद्यार्थ्यांकडून सिडबॉल्स निर्मिती, सिडबॉल्स तयार करण्यासाठी कार्यशाळा, पशु-पक्ष्यांसाठी पाणवठे उभारणी, शहरातील महिलांसाठी “माझी परसबाग” स्पर्धा, वृक्षारोपण, पंचवटी निर्मिती तसेच पर्यावरण जनजागृती अभियान अशा विविध नाविन्यपूर्ण उपक्रमांचा समावेश करण्यात आला आहे.पर्यावरण संवर्धनासोबतच प्रत्येक नागरिकामध्ये वृक्षांविषयी आपुलकी निर्माण व्हावी, हा या अभियानामागील प्रमुख उद्देश असल्याचे यावेळी सांगण्यात आले. या उपक्रमासाठी लागणारी विविध प्रकारची वृक्षरोपे “कल्पना फाउंडेशन” तसेच डॉ. सचिन करोडपती यांच्या माध्यमातून उपलब्ध करून देण्यात येणार आहेत.तसेच समितीच्या वतीने शहरातील विविध शाळांना भेटी देऊन विद्यार्थ्यांना पर्यावरण जनजागृती व मार्गदर्शन करण्यात येणार आहे. या अभियानात डॉ. सुदर्शन जैन, रवींद्र निकम, लोमेश पाटील, कल्पेश नावरकर, मंगेश पवार, धर्मेंद्र शिंपी, भरत जाधव सर, श्री. नेरपगार, श्री. चौधरी सर आदी मान्यवर सहकार्य करणार आहेत.महिलांसाठी आयोजित करण्यात येणाऱ्या “माझी परसबाग” स्पर्धेसाठी शहरातील प्रत्येक विभागनिहाय निरीक्षक व निवड समिती लवकरच नियुक्त करण्यात येणार असल्याची माहिती बैठकीत देण्यात आली. या स्पर्धेमुळे महिलांमध्ये घरगुती बागकाम व पर्यावरणपूरक जीवनशैलीबाबत जागृती निर्माण होण्यास मदत होणार आहे.“सिडबॉल्स कॅम्पेन”चे हे आठवे वर्ष असून हा उपक्रम सर्वांसाठी खुला असल्याचे आयोजकांनी सांगितले. बैठकीस पाच शाळा, दोन महाविद्यालये तसेच विविध सामाजिक संघटनांचे प्रतिनिधी उपस्थित होते. पर्यावरण संवर्धन ही काळाची गरज असल्याने गावासाठी सर्वांनी एकत्र येऊन कार्य करणे आवश्यक असल्याचे मत उपस्थितांनी व्यक्त केले.
प्रतिक्रिया :-
“गेल्या अनेक वर्षांपासून शहरात सिडबॉल्स कॅम्पेन प्रभावीपणे राबविण्यात येत आहे. पर्यावरण संवर्धनासाठी समाजातील प्रत्येक घटकाने पुढे येणे आवश्यक असून, यंदा अधिक व्यापक स्वरूपात उपक्रम राबविण्यात येणार आहेत.”— राहुल निकम, मुख्य समन्वयक – सिडबॉल्स कॅम्पेन २०२६-२७
सदर उपक्रमामध्ये सहभागी होण्यासाठी इच्छुक नागरिकांनी मुख्य समन्वयक राहुल निकम यांच्याशी संपर्क साधावा, असे आवाहन आयोजकांच्या वतीने करण्यात आले आहे।