महिला व बाल विकास भवनांची कामे प्राधान्याने पूर्ण करा – मंत्री आदिती तटकरे

मुंबई, दि. २१ : राज्यातील महिला व बाल विकास विभागाच्या विविध योजनांची प्रभावी अंमलबजावणी तसेच लाभार्थ्यांना एकाच छताखाली सेवा उपलब्ध करून देण्यासाठी उभारण्यात येत असलेल्या महिला व बाल विकास भवन प्रकल्पांची कामे प्राधान्याने पूर्ण करण्याचे निर्देश महिला व बाल विकास मंत्री आदिती तटकरे यांनी दिले.

मंत्रालयात त्यांच्या अध्यक्षतेखाली झालेल्या बैठकीमध्ये राज्यातील महिला व बाल विकास भवन प्रकल्पांच्या सद्यस्थितीचा सविस्तर आढावा घेण्यात आला.

यावेळी मंत्री आदिती तटकरे म्हणाल्या की, राज्यातील प्रत्येक जिल्ह्यात महिला व बाल विकास विभागाच्या विविध कार्यालयांना स्वतंत्र आणि सुसज्ज इमारती उपलब्ध करून देण्याच्या उद्देशाने हा महत्त्वाकांक्षी उपक्रम राबविण्यात येत आहे. या माध्यमातून महिला व बाल विकास अधिकारी कार्यालय, बाल विकास प्रकल्प अधिकारी कार्यालय तसेच विभागाच्या विविध सेवा एकाच ठिकाणी उपलब्ध होणार असून लाभार्थ्यांना अधिक सुलभ आणि परिणामकारक सेवा मिळणार आहे.

राज्यातील २३ जिल्ह्यांमध्ये महिला व बाल विकास भवनासाठी जागा उपलब्ध झाली असून त्यापैकी १८ जिल्ह्यांमध्ये जागा विभागाच्या ताब्यात देण्यात आली आहे. ९ जिल्ह्यांमध्ये प्रत्यक्ष बांधकाम सुरू असून ६ जिल्ह्यांमध्ये इमारतींचे बांधकाम पूर्ण झाले आहे.

अकोला, अमरावती, यवतमाळ, वाशिम, परभणी आणि जळगाव या जिल्ह्यांतील महिला व बाल विकास भवनांची इमारत पूर्ण झाली असून त्यापैकी अकोला, अमरावती, यवतमाळ आणि जळगाव येथील भवनांचे उद्घाटन पार पडले असल्याची माहिती यावेळी बैठकीत देण्यात आली.

महिला व बाल विकास विभागाच्या योजनांचा लाभ तळागाळातील महिला, बालके आणि इतर लाभार्थ्यांपर्यंत अधिक प्रभावीपणे पोहोचण्यासाठी आधुनिक आणि सर्व सुविधांनी युक्त भवनांची कामे प्राधान्याने पूर्ण करावीत. प्रलंबित कामांमध्ये कोणतीही दिरंगाई होऊ नये तसेच सर्व बांधकामे गुणवत्तापूर्ण आणि निर्धारित वेळेत पूर्ण व्हावीत, यासाठी प्रशासनाने समन्वयाने काम करण्याच्या सूचना मंत्री आदिती तटकरे यांनी दिल्या.

0000