पारोळा : टायगर इंटरनॅशनल स्कूल येथे आंतरराष्ट्रीय योग दिन उत्साहपूर्ण वातावरणात साजरा करण्यात आला. कार्यक्रमाची सुरुवात सरस्वती पूजन व दीपप्रज्वलनाने झाली. यानंतर उपस्थित मान्यवरांचे स्वागत व सत्कार करण्यात आला.कार्यक्रमाच्या प्रास्ताविकात प्राचार्य पी. एस. पाटील यांनी योगाचे महत्त्व अधोरेखित करत विद्यार्थ्यांना नियमित योगाभ्यास करण्याचे आवाहन केले. प्रमुख पाहुणे आचार्य विकास सोनवणे यांनी योगाची परंपरा, विविध योगासने तसेच त्यांचे शारीरिक व मानसिक आरोग्यावर होणारे सकारात्मक परिणाम याविषयी मार्गदर्शन केले. तसेच पी. के. सोनजे यांनीही निरोगी जीवनासाठी योगाचे अनन्यसाधारण महत्त्व स्पष्ट केले.यानंतर आयोजित योग सत्रामध्ये विद्यार्थ्यांसह शिक्षकांनी उत्स्फूर्त सहभाग घेत विविध योगासने व प्राणायामाचा सराव केला. योगाभ्यासामुळे शारीरिक तंदुरुस्तीबरोबरच मानसिक शांतता आणि एकाग्रता वाढते, असा संदेश यावेळी देण्यात आला.या कार्यक्रमास संस्थेचे अध्यक्ष रविंद्र पाटील व संचालिका रूपाली पाटील यांची प्रमुख उपस्थिती लाभली. तसेच प्राचार्य पी. एस. पाटील, अजीम शेख, उपप्राचार्या कविता सूर्यवंशी, स्कूल समन्वयक नम्रता बेडीस्कर, विभाग प्रमुख वृषाली पाटील, काजल सिंधी, क्लार्क श्रीकांत खैरनार तसेच सर्व शिक्षक व शिक्षकेतर कर्मचाऱ्यांनी कार्यक्रमाच्या यशस्वी आयोजनासाठी परिश्रम घेतले.कार्यक्रमाचे सूत्रसंचालन काजल सिंधी यांनी केले, तर नम्रता बेडीस्कर यांनी आभार प्रदर्शन केले. “करू योग, राहू निरोग” हा संदेश देत विद्यार्थ्यांनी निरोगी जीवनशैली अंगीकारण्याचा संकल्प केला.
