पुण्यश्लोक अहिल्यादेवी होळकर शेतकरी कर्जमुक्ती योजना २०२६; तालुकास्तरीय समित्या गठीत

सोलापूर, दि. २९:- महाराष्ट्र शासनाने शेतकऱ्यांना थकीत कर्जाच्या विळख्यातून मुक्त करण्यासाठी पुण्यश्लोक अहिल्यादेवी होळकर शेतकरी कर्जमुक्ती योजना 2026 जाहीर केली आहे. या योजनेची अंमलबजावणी काटेकोरपणे व जलदगतीने करण्यासाठी जिल्हा उपनिबंधक, सहकारी संस्था, सोलापूर यांच्या आदेशानुसार तालुकास्तरीय समित्या गठीत करण्यात आल्या आहेत, अशी माहिती जिल्हा उपनिबंधक किरण गायकवाड यांनी दिली.

तालुकास्तरीय समितीमध्ये सहाय्यक निबंधक, सहकारी संस्था हे अध्यक्ष म्हणून, तालुका लेखापरीक्षक/उपलेखापरीक्षक व तालुका समन्वयक गटसचिव हे सदस्य म्हणून तर सिनिअर बँक इन्स्पेक्टर, जिल्हा मध्यवर्ती सहकारी बँक लि., सोलापूर हे सदस्य सचिव म्हणून कार्यरत राहणार आहेत. या समितीच्या माध्यमातून योजनेची अंमलबजावणी पारदर्शक व शिस्तबद्ध पद्धतीने होणार आहे.

समितीचे कामकाजात 31 मार्च 2026 पर्यंतचे सर्व रेकॉर्ड अद्ययावत करणे, Annexure-A मधील माहिती अचूक भरणा करून सादर करणे, पात्र शेतकऱ्यांचे आधार कार्ड, फार्मर आयडी, सेव्हींग खाते क्रमांक व कर्जरोखा तपासणीवेळी उपलब्ध करणे, नियुक्त लेखापरीक्षकांना आवश्यक दप्तर उपलब्ध करून देणे, वैधानिक लेखापरीक्षण अहवाल सादर करणे तसेच कोणताही पात्र शेतकरी योजनेपासून वंचित राहणार नाही याची दक्षता घेणे यांचा समावेश आहे.ही योजना शेतकऱ्यांना आर्थिक दिलासा देऊन त्यांच्या शेती व्यवसायात स्थैर्य निर्माण करण्यासाठी महत्वाची ठरणार आहे.

*****

जिल्हा माहिती कार्यालय