राजर्षी शाहू महाराज ज्येष्ठ साहित्यिक-कलाकार सन्मान योजनेसाठी १ ते ३१ जुलैदरम्यान अर्ज करण्याचे आवाहन

मुंबई, दि. ८ : राजर्षी शाहू महाराज ज्येष्ठ साहित्यिक व कलाकार सन्मान योजनेंतर्गत कला आणि साहित्य क्षेत्रात उल्लेखनीय योगदान देणाऱ्या १०० ज्येष्ठ साहित्यिक व कलाकारांना दरमहा ५,००० रुपये मानधन दिले जाणार आहे. या योजनेसाठी पात्र लाभार्थ्यांनी १ ते ३१ जुलै २०२६ या कालावधीत ‘आपले सरकार’ पोर्टलवर ऑनलाइन अर्ज करावेत, असे आवाहन मुंबई शहर निवासी उपजिल्हाधिकारी डॉ. शिवनंदा लंगडापूरे यांनी केले आहे.

या योजनेअंतर्गत अर्जदाराचे वय ५० वर्षांपेक्षा अधिक असणे आवश्यक असून, दिव्यांग कलाकारांसाठी वयोमर्यादेत १० वर्षांची शिथिलता देण्यात आली आहे. त्यामुळे दिव्यांग अर्जदारांसाठी किमान वय ४० वर्षे ठेवण्यात आले आहे. अर्जदाराचे कला किंवा साहित्य क्षेत्रातील योगदान किमान १५ वर्षांचे असणे आवश्यक आहे. तसेच वयाने ज्येष्ठ असलेले विधवा, परित्यक्ता आणि दिव्यांग कलाकारांना प्राधान्य दिले जाणार आहे.

योजनेसाठी अर्ज करणाऱ्या कलाकाराचे वार्षिक उत्पन्न ६० हजार रुपयांपेक्षा अधिक नसावे. ज्यांची उपजीविका केवळ कलेवर अवलंबून असून अन्य कोणतेही उत्पन्नाचे साधन नाही, अशा कलाकारांनाच या योजनेचा लाभ मिळणार आहे. तसेच केंद्र किंवा राज्य शासनाच्या कोणत्याही महामंडळाच्या अथवा नियमित मासिक पेन्शन योजनेचा लाभ घेणारे या योजनेसाठी पात्र असणार नाहीत. अर्जदार महाराष्ट्राचा रहिवासी असणे बंधनकारक आहे.

ऑनलाइन अर्ज भरताना वयाचा दाखला, आधार कार्ड, उत्पन्नाचा दाखला, रहिवासी दाखला, प्रतिज्ञापत्र, पती-पत्नीचा संयुक्त छायाचित्र (लागू असल्यास), बँक पासबुक, अपंगत्व प्रमाणपत्र (लागू असल्यास), राज्य किंवा केंद्र शासनाचे संबंधित प्रमाणपत्र (लागू असल्यास), नामांकित संस्था अथवा व्यक्तींचे शिफारसपत्र (लागू असल्यास) तसेच आवश्यक इतर पुरावे सादर करणे बंधनकारक असल्याचे प्रशासनाने स्पष्ट केले आहे.

पात्र ज्येष्ठ साहित्यिक आणि कलाकारांनी अर्जाची मुदत लक्षात घेऊन ३१ जुलैपूर्वी ऑनलाइन अर्ज सादर करून योजनेचा लाभ घ्यावा, असे आवाहनही डॉ. शिवनंदा लंगडापूरे यांनी केले आहे.

000

संजय ओरके/विसंअ