मुंबई, दि. ९ :- केंद्र व राज्य शासन, आस्थापना व त्यांचे अंगिकृत उद्योग, व्यवसाय, महामंडळे, महापालिका, तसेच खासगी क्षेत्रातील आस्थापनांना मनुष्यबळाचे दर तिमाही अखेर (एप्रिल, मे, जून) विवरण सादर करणे बंधनकारक आहे. २५ किंवा त्यापेक्षा अधिक कामगार काम करतात अशा सर्व आस्थापना, उद्योग, व्यापार, कारखाने, यांना सेवायोजन कार्यालये यांनी रिक्तपदे अधिसूचित करण्याची सक्ती करणारा कायदा १९५९ व अंतर्गत नियमावली १९६० नुसार मनुष्यबळाचे त्रैमासिक विवरणपत्र ईआर-१ प्रत्येक तिमाही संपल्यानंतर ३० दिवसांच्या आत सादर करणे बंधनकारक आहे. तसेच ज्या उद्योजकांनी महास्वयंम वेब पोर्टलवर नोंदणी केलेली नाही त्या उद्योजकांनी खाली दिलेल्या लिंकवर ऑनलाईन नोंदणी करून घ्यावी, असे आवाहन मुंबई शहरचे कौशल्य विकास सहायक आयुक्त यांनी केले आहे.
विवरणपत्र (ईआर-१) हे ऑनलाईन पध्दतीने https://rojgar.mahaswaym.gov.in या वेबपोर्टलवर सादर करण्याची सुविधा उपलब्ध आहे. या सुविधेचा वापर करुन ३० जुलै, २०२६ पर्यंत विवरणपत्र (ईआर-१) सादर करावे, असे आवाहन सुनिल शं. पवार, जिल्हा कौशल्य विकास रोजगार व उद्योजकता मार्गदर्शन केंद्र, सहायक आयुक्त, मुंबई शहर यांनी केले आहे. मुंबई शहर जिल्हा अंतर्गत येणारे सर्व नियोक्ते / आस्थापना यांनी https://rojgar.mahaswaym.gov.in या वेबपोर्टलवर तिमाही विवरणपत्र ईआर १ सादर करण्याची दक्षता घ्यावी. वेबसाइटच्या एम्प्लॉयर या टॅबवर क्लिक करुन एम्प्लॉयर लॉग इनमध्ये युजर आयडी व पासवर्ड वापरुन लॉगइन करावे आणि ईआर रिपोर्ट मध्ये ईआर १ या ऑप्शनवर क्लिक करुन तिमाही विवरणपत्र ऑनलाईन सादर करणे आवश्यक आहे.
अधिक माहिती मार्गदर्शन अथवा तांत्रिक अडचण असल्यास [email protected] या ईमेलवर संपर्क करावा. ३० जून, २०२६ च्या तिमाही अखेर हजेरी पटावर असलेल्या सर्व मनुष्यबळाच्या माहितीचे विवरणपत्र (ईआर-१) ३० जुलै, २०२६ पर्यंत महास्वयम वेबसाईटवर ऑनलाईन सादर करणे बंधनकारक आहे. (ER-1) ऑफलाईन स्वीकारले जाणार नाही याची कृपया नोंद घ्यावी, असे सहायक आयुक्त यांनी सूचित केले आहे.
००००