वाघोशी जलसिंचन प्रकल्पासाठी उर्वरित कामांना गती द्या; सुधारित प्रस्ताव सादर करा – जलसंपदा मंत्री राधाकृष्ण विखे पाटील

मुंबई, दि. १०: सातारा जिल्ह्यातील वाघोशी जलसिंचन प्रकल्पातील विविध कामांचा आढावा घेताना जलसंपदा मंत्री राधाकृष्ण विखे पाटील यांनी कालव्यांच्या अस्तरीकरणाचे व उर्वरित कामे तातडीने पूर्ण करण्यासाठी निधी उपलब्ध करून देण्यात येईल या दृष्टीने सुधारित प्रस्ताव सादर करण्याचे निर्देश दिले.

मंत्रालयातील परिषद सभागृहात जलसंपदा विभागाच्या विविध प्रकल्पांबाबत मंत्री विखे पाटील यांच्या अध्यक्षतेखाली आयोजित बैठकीत याबाबत आढावा घेण्यात आला.

वाघोशी जलसिंचन प्रकल्पांतर्गत १४७ किलोमीटर लांबीच्या कालव्यांच्या अस्तरीकरणासाठी शासनाने यापूर्वीच प्रशासकीय मान्यता दिली होती. त्यापैकी ४७ किलोमीटर कालव्यांचे काम पूर्ण झाले आहे. या प्रस्तावाला उच्चस्तरीय समितीची मान्यता यापूर्वीच प्राप्त झाली असून प्रकल्प पूर्ण झाल्यानंतर फलटण तालुक्यातील अनेक गावांना सिंचनासाठी पाणी उपलब्ध होणार आहे. या कामासाठी नाबार्डच्या माध्यमातून राबविण्यात येणाऱ्या योजनेतून निधी उपलब्ध करून देण्याबाबतही बैठकीत चर्चा झाली.

निरा देवघर धरणातून मंजूर असलेले पाणी वाघोशी उपसा सिंचन योजनेद्वारे कार्यान्वित करण्यात येते. हे पाणी धोम-बलकवडी कालव्यात सोडून दुष्काळी भागातील शेतकऱ्यांना सिंचनाचा लाभ मिळवून दिला जात असल्याची माहिती यावेळी देण्यात आली.

बैठकीत निरा देवघर प्रकल्पाचाही आढावा घेण्यात आला. सुमारे २३० कोटी रुपये खर्चाच्या या प्रकल्पाद्वारे सांगोला तालुक्यासाठी पाणी उपलब्ध करून देण्याच्या दृष्टीने नियोजन करण्यात येत आहे. तसेच रिठेवाडी प्रकल्पात पाण्याचा पुरेसा साठा नसल्याने तेथे पाणी उपलब्ध करून देण्यासाठी करण्यात येणाऱ्या उपाययोजनांची माहिती मंत्री विखे पाटील यांनी घेतली.

यावेळी मंत्री विखे पाटील म्हणाले की, उजनी धरणातील अतिरिक्त पाणी रिठेवाडी प्रकल्पासाठी उपलब्ध करून देण्याच्या दृष्टीने उपसा सिंचन योजना राबविण्यात येतील. तसेच सीना–माढा उपसा सिंचन योजनेच्या कामाचाही बैठकीत सविस्तर आढावा घेण्यात आला.

बैठकीस आमदार सचिन पाटील, आमदार बाबासाहेब देशमुख, आमदार राहुल कुल, आमदार अभिजीत पाटील, माजी खासदार रणजितसिंह नाईक-निंबाळकर, माजी आमदार शहाजीबापू पाटील, जलसंपदा विभागाचे प्रधान सचिव एकनाथ डवले, कृष्णा पाटबंधारे विकास महामंडळाचे कार्यकारी संचालक धुमाळ, कार्यकारी अभियंता राजश्री आहेरराव तसेच महसूल व जलसंपदा विभागातील वरिष्ठ अधिकारी उपस्थित होते.

0000

किरण वाघ/विसंअ