ज्येष्ठ पत्रकार बाळासाहेब पाटील यांना ‘राष्ट्रीय समाजभूषण पुरस्कार’; महाराष्ट्र राज्य कोअर कमिटी अध्यक्षपदी नियुक्ती

पारोळा | प्रतिनिधी (प्रतीक मराठे)
पारोळा तालुक्यातील ज्येष्ठ पत्रकार, राजपूत समाजाचे निष्ठावंत सेवाभावी कार्यकर्ते बाळासाहेब हिलाल पाटील (राजपूत) यांना श्री राष्ट्रीय राजपूत करणी सेनेतर्फे ‘राष्ट्रीय समाजभूषण पुरस्कार’ प्रदान करून गौरविण्यात आले. याचबरोबर त्यांची श्री राष्ट्रीय राजपूत करणी सेनेच्या महाराष्ट्र राज्य कोअर कमिटी अध्यक्षपदी नियुक्ती करण्यात आल्याने त्यांचा दुहेरी सन्मान झाला आहे.
जळगाव येथे संस्थापक अध्यक्ष स्व. सुखदेवसिंह दादा गोगामेडी यांच्या जयंतीनिमित्त आयोजित भव्य कार्यक्रमात हा गौरव सोहळा पार पडला. समाजहित, राष्ट्रहित आणि मानवतेच्या सेवेसाठी केलेल्या उल्लेखनीय कार्याची दखल घेत बाळासाहेब पाटील यांना हा प्रतिष्ठेचा पुरस्कार प्रदान करण्यात आला.
गेल्या चार दशकांपासून पत्रकारितेच्या माध्यमातून सामाजिक कार्यात सक्रिय असलेल्या बाळासाहेब पाटील यांनी राजपूत समाजासह विविध समाजघटकांच्या अडीअडचणीच्या काळात मदतीचा हात देत उल्लेखनीय योगदान दिले आहे. त्यांच्या सामाजिक बांधिलकी, निस्वार्थ सेवाभाव आणि पत्रकारितेतील कार्याचा यावेळी उपस्थित मान्यवरांनी गौरव केला.
जळगाव येथील सुदर्शन लॉनच्या सभागृहात आयोजित कार्यक्रमात स्व. सुखदेवसिंह दादा गोगामेडी यांना अभिवादन करण्यात आले. यावेळी विविध क्षेत्रातील उद्योजक, गुणवंत विद्यार्थी आणि समाजकार्यात उल्लेखनीय योगदान देणाऱ्या व्यक्तींचा सन्मान करण्यात आला.
या कार्यक्रमात श्री राष्ट्रीय राजपूत करणी सेनेच्या राष्ट्रीय कार्याध्यक्षा शिलाताई सुखदेवसिंह गोगामेडी, उपाध्यक्ष कट्यारजी, जीवनसिंह राजपूत, प्रदेशाध्यक्ष प्रवीणसिंग राजपूत, आनंदसिंग ठोके आदी मान्यवरांच्या हस्ते बाळासाहेब पाटील यांना शाल, श्रीफळ, सन्मानपत्र आणि ‘राष्ट्रीय समाजभूषण पुरस्कार’ प्रदान करण्यात आला. तसेच त्यांना महाराष्ट्र राज्य कोअर कमिटी अध्यक्षपदी नियुक्ती करण्यात आली आहे .
बाळासाहेब पाटील यांच्या या दुहेरी सन्मानाबद्दल पारोळा शहरासह तालुक्यातील पत्रकार, सामाजिक, राजकीय व विविध क्षेत्रातील मान्यवरांनी त्यांचे अभिनंदन करून पुढील सामाजिक व संघटनात्मक कार्यासाठी शुभेच्छा व्यक्त केल्या.