‘भारत टेक्स’च्या धर्तीवर महाराष्ट्र सदनात वस्त्रोद्योग प्रदर्शन व विक्री; दिल्लीकरांना पारंपरिक वस्त्रांची पर्वणी

नवी दिल्ली, दि. १७: नवी दिल्लीतील प्रगती मैदान येथील भारत मंडपममध्ये सुरू असलेल्या देशातील सर्वात मोठ्या जागतिक वस्त्रोद्योग प्रदर्शन ‘भारत टेक्स २०२६’च्या धर्तीवर महाराष्ट्राच्या समृद्ध वस्त्रोद्योग परंपरेचा परिचय दिल्लीकरांना करून देण्यासाठी महाराष्ट्र राज्य हातमाग सहकारी महासंघ मर्यादित (महाटेक्स) आणि येथील महाराष्ट्र सदन यांच्या संयुक्त विद्यमाने कस्तुरबा गांधी मार्गावरील नवीन महाराष्ट्र सदनात १८ ते २० जुलै २०२६ या कालावधीत विशेष वस्त्रोद्योग प्रदर्शन व विक्रीचे आयोजन करण्यात आले आहे.

महाराष्ट्र शासनाच्या नवी दिल्लीतील निवासी आयुक्त तथा सचिव श्वेता सिंघल यांच्या पुढाकाराने आयोजित करण्यात आलेले हे तीन दिवसीय प्रदर्शन दररोज सकाळी ११ ते सायंकाळी ८ वाजेपर्यंत सर्व नागरिकांसाठी विनामूल्य खुले राहणार आहे.

‘भारत टेक्स २०२६’मध्ये भागीदार राज्य म्हणून सहभागी झालेल्या महाराष्ट्राच्या दालनाला देश-विदेशातील खरेदीदार, निर्यातदार आणि व्यावसायिक प्रतिनिधींकडून उत्स्फूर्त प्रतिसाद मिळत आहे. त्याच धर्तीवर महाराष्ट्रातील विणकरांनी तयार केलेली पारंपरिक, दर्जेदार आणि वैशिष्ट्यपूर्ण उत्पादने दिल्लीतील नागरिकांना थेट उपलब्ध करून देण्याच्या उद्देशाने नवीन महाराष्ट्र सदनात या विशेष प्रदर्शनाचे आयोजन करण्यात आले आहे. त्यामुळे प्रगती मैदानातील जागतिक प्रदर्शनाचा अनुभव आणि महाराष्ट्राच्या पारंपरिक वस्त्रसंपदेची खरेदी करण्याची संधी आता दिल्लीकरांना महाराष्ट्र सदनातच मिळणार आहे.

या प्रदर्शनात महाराष्ट्राची सांस्कृतिक ओळख असलेल्या पैठणी, करवत काठी साड्या, हिमरू, खण साड्या, सोलापूरच्या प्रसिद्ध चादरी, बांबू व टेरी टॉवेल्स तसेच जीआय टॅग प्राप्त कोल्हापुरी चपला यांसारख्या विविध उत्पादनांचे प्रदर्शन आणि विक्री होणार आहे. राज्यातील विणकरांकडून थेट दर्जेदार उत्पादने खरेदी करण्याची ही दिल्लीकरांसाठी एक विशेष संधी असून, महाराष्ट्राच्या समृद्ध हस्तकला आणि वस्त्रोद्योग परंपरेचा जवळून अनुभव घेण्यासाठी या प्रदर्शनाला मोठ्या संख्येने भेट द्यावी, असे आवाहन श्वेता सिंघल यांनी केले आहे.

००००

महाराष्ट्र परिचय केंद्र, नवी दिल्ली