बुलढाण्यातील माईस प्रकल्प आणि सिंदखेड राजा येथील जिजाऊ सृष्टी उभारणीला गती देणार – मंत्री शंभूराज देसाई

मुंबई, दि. ६: बुलढाणा जिल्ह्यातील चिखली तालुक्यातील हातणी व वळती येथील माईस प्रकल्पाबरोबरच सिंदखेड राजा येथे राजमाता जिजाऊंच्या जन्मस्थळाच्या ऐतिहासिक महत्वाला साजेशी ‘जिजाऊ सृष्टी’ उभारण्याच्या प्रस्तावाला गती देण्यासाठी शासन आवश्यक ती कार्यवाही करेल. या दोन्ही प्रकल्पांमुळे विदर्भातील पर्यटनाला नवी दिशा मिळेल, असे पर्यटन मंत्री शंभूराज देसाई यांनी सांगितले.

मंत्रालयात बुलढाणा जिल्ह्याच्या चिखली तालुक्यातील मौजे हातणी व वळती येथील प्रस्तावित माईस (मीटिंग्ज, इन्सेटिव्ह, कॉन्फरन्स अँड एक्झीबिशन) प्रकल्प तसेच शिवसृष्टी उभारणी आणि सिंदखेड राजा येथील प्रस्तावित जिजाऊ सृष्टीसंदर्भात आढावा बैठक पार पडली. बैठकीस राज्याचे मदत व पुनर्वसन मंत्री तथा बुलढाणा जिल्ह्याचे पालकमंत्री मकरंद आबा पाटील, आमदार श्वेता महाले, आमदार मनोज कायंदे, महाराष्ट्र पर्यटन विकास महामंडळाचे व्यवस्थापकीय संचालक नीलेश गटणे, पर्यटन विभागाचे उपसचिव विजय पोवार, सहाय्यक संचालक रवींद्र पवार तसेच दूरदृश्य प्रणालीद्वारे बुलढाण्याचे जिल्हाधिकारी, उपवनसंरक्षक, पुरातत्त्व विभागाचे सहाय्यक संचालक आणि संबंधित अधिकारी उपस्थित होते.

बैठकीत हातणी व वळती येथील प्रस्तावित माईस प्रकल्पासाठी आवश्यक जमीन महाराष्ट्र पर्यटन विकास महामंडळाकडे हस्तांतरित करण्याबाबत बुलढाणा जिल्हाधिकाऱ्यांना सूचना देण्यात आल्या. तसेच प्रकल्पाचा मास्टर प्लॅन, वास्तुरचना, सविस्तर प्रकल्प अहवाल आणि खर्चाचा अंदाज तातडीने तयार करण्याच्या सूचनाही संबंधित अधिकाऱ्यांना देण्यात आल्या. प्रकल्पासाठी आवश्यक आर्थिक तरतूद, निधी नियोजन तसेच पुढील अंमलबजावणीच्या आराखड्यावरही सविस्तर चर्चा करण्यात आली.

याशिवाय, सिंदखेड राजा येथे राजमाता जिजाऊंच्या जन्मस्थळाच्या सर्वांगीण विकासासाठी प्रस्तावित  मातृतीर्थ ‘जिजाऊ सृष्टी’ उभारण्याबाबतही बैठकीत सविस्तर चर्चा करण्यात आली. सिंदखेड राजा येथील राजमाता जिजाऊ जन्मस्थळ विकास आराखड्याअंतर्गत यापूर्वी विविध संवर्धन व जतनाची कामे पूर्ण करण्यात आली असून, या ऐतिहासिक स्थळाला अधिक आकर्षक, अभ्यासपूर्ण आणि पर्यटनदृष्ट्या सक्षम स्वरूप देण्याच्या दृष्टीने जिजाऊ सृष्टी विकसित करण्याचा प्रस्ताव विचाराधीन आहे.

या प्रकल्पाबाबत मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्याकडे प्रस्ताव सादर करून मान्यता मिळविण्यासाठी पाठपुरावा करण्यात येणार आहे. अंतिम निर्णयानंतर बुलढाणा जिल्ह्याचे पालकमंत्री मकरंद आबा पाटील यांच्या समन्वयाने पर्यटन विभागाशी संबंधित सर्व कामांचे नियोजन, सविस्तर आराखडा, आवश्यक निधीची तरतूद आणि टप्प्याटप्प्याने अंमलबजावणी करण्यात येईल.

राजमाता जिजाऊंचा प्रेरणादायी इतिहास, वारसा आणि सांस्कृतिक वैभव आधुनिक माध्यमांतून पर्यटकांसमोर प्रभावीपणे उभे करण्याच्या दृष्टीने हा प्रकल्प महत्त्वपूर्ण ठरेल, असा विश्वास यावेळी व्यक्त करण्यात आला.

0000

संध्या गरवारे/विसंअ