शालेय विद्यार्थ्यांच्या सुरक्षित प्रवासासाठी टायगर इंटरनॅशनल स्कूलचा आदर्श उपक्रम; व्हॅन व रिक्षा चालकांना वाहतूक नियमांचे प्रशिक्षण

पारोळा, प्रतिनिधी : आंतरराष्ट्रीय वाहतूक सिग्नल दिनानिमित्त टायगर इंटरनॅशनल स्कूल, पारोळा येथे परिवहन समितीची विशेष बैठक उत्साहात पार पडली. विद्यार्थ्यांच्या सुरक्षित प्रवासाच्या दृष्टीने सर्व खाजगी स्कूल व्हॅन व रिक्षा चालकांना वाहतूक नियम, विद्यार्थी सुरक्षा आणि सुरक्षित वाहनचालना याबाबत सविस्तर मार्गदर्शन करण्यात आले.कार्यक्रमास प्रमुख मार्गदर्शक म्हणून API अशोक पिंपळे, हेड कॉन्स्टेबल अविनाश जाधव, हेड कॉन्स्टेबल दीपक पाटील तसेच कॉन्स्टेबल तुषार सोनवणे उपस्थित होते. त्यांनी वाहनचालकांना वेगमर्यादेचे पालन, वाहनांची नियमित तपासणी, विद्यार्थ्यांना सुरक्षितपणे शाळेत आणणे-नेणे, शाळा परिसरात सावकाश वाहन चालविणे आणि आपत्कालीन परिस्थितीत घ्यावयाची खबरदारी याबाबत मार्गदर्शन केले.संस्थेचे अध्यक्ष रविंद्र पाटील यांनी विद्यार्थ्यांची सुरक्षितता ही सर्वांची सामूहिक जबाबदारी असल्याचे सांगत प्रत्येक वाहनचालकाने वाहतूक नियमांचे काटेकोर पालन करण्याचे आवाहन केले.यावेळी शाळेचे प्राचार्य पी. एस. पाटील, प्री-स्कूल प्राचार्य अजीम शेख, उपप्राचार्या कविता सूर्यवंशी, स्कूल समन्वयक नम्रता बेडिस्कर, विभाग प्रमुख वृषाली पाटील व काजल सिंधी, क्लार्क श्रीकांत खैरनार, सर्व शिक्षक, शिक्षकेतर कर्मचारी, परिवहन समितीचे सदस्य तसेच सर्व खाजगी व्हॅन व रिक्षा चालक उपस्थित होते.बैठकीत शालेय परिवहन व्यवस्थेतील सुरक्षितता, वाहतूक नियमांचे प्रभावी पालन, वाहनांची नियमित तपासणी आणि चालकांच्या जबाबदाऱ्यांवर सविस्तर चर्चा करण्यात आली. उपस्थित सर्व वाहनचालकांनी विद्यार्थ्यांच्या सुरक्षिततेला सर्वोच्च प्राधान्य देत वाहतूक नियमांचे प्रामाणिकपणे पालन करण्याची ग्वाही दिली.

समारोप संदेश : “वाहतूक नियमांचे पालन करा, स्वतः सुरक्षित रहा आणि विद्यार्थ्यांनाही सुरक्षित ठेवा.”