कृषी विद्यापीठांचे सेवा प्रवेश नियम अधिक सुसंगत करावे – मंत्री दत्तात्रय भरणे

मुंबई, दि. १२: राज्यातील चारही कृषी विद्यापीठांमधील शिक्षक व शिक्षकेतर कर्मचाऱ्यांच्या सेवा प्रवेश नियमांमध्ये एकसूत्रता आणून गुणवत्ता व ज्येष्ठतेला प्राधान्य मिळावे. सेवा प्रवेश नियम हॆ अधिक सुसंगत, गुणवत्ताधारित आणि राष्ट्रीय मानकांशी अनुरूप असावेत, असे निर्देश कृषी मंत्री दत्तात्रय भरणे यांनी दिले.

आमदार रणधीर सावरकर यांच्यासह महाराष्ट्र कृषी शिक्षण व संशोधन परिषद, पुणे तसेच चारही कृषी विद्यापीठांच्या प्रतिनिधींच्या उपस्थितीत झालेल्या या बैठकीत सेवा प्रवेश नियमांचा सविस्तर आढावा घेण्यात आला. शासनाने कृषी व पदुम विभागाच्या  १० जून २०२६ रोजीच्या शासन निर्णयानुसार चारही कृषी विद्यापीठांतील गट-अ व गट-ब संवर्गातील पदांच्या सुधारित आकृतिबंधास मान्यता दिली आहे. त्यानुसार राज्यातील महात्मा फुले कृषी विद्यापीठ, राहुरी, डॉ. बाळासाहेब सावंत कोकण कृषी विद्यापीठ, दापोली, वसंतराव नाईक मराठवाडा कृषी विद्यापीठ, परभणी आणि डॉ. पंजाबराव देशमुख कृषी विद्यापीठ, अकोला या चारही कृषी विद्यापीठांमध्ये सेवा प्रवेश नियमांची समान अंमलबजावणी करण्याच्या दृष्टीने या बैठकीत चर्चा करण्यात आली.

सेवा प्रवेश नियम निश्चित करताना ‘गुणवत्ता व ज्येष्ठता’ हे प्रमुख तत्व ठेवण्याची भूमिका बैठकीत मांडण्यात आली. शिक्षकवर्गीय तसेच शिक्षकेतर पदांसाठी सेवा प्रवेशाची प्रक्रिया निश्चित करताना संबंधित कायदे, परिनियम आणि शासन निर्णय यांचा आधार घेण्यात आला आहे. भारतीय कृषी अनुसंधान परिषद आणि विद्यापीठ अनुदान आयोग यांच्या मार्गदर्शक तत्वांचाही विचार करण्यात आला आहे. चारही कृषी विद्यापीठांमध्ये सेवा प्रवेश नियमांची एकसमान अंमलबजावणी व्हावी, यासाठी परिनियमांमधील संबंधित तरतुदींचा आधार घेऊन नियम तयार करण्याचा प्रस्ताव आहे. विद्यापीठांच्या शैक्षणिक गुणवत्तेवर तसेच राष्ट्रीय स्तरावरील मानकांवर होणाऱ्या परिणामांचाही विचार करण्याचे निर्देश यावेळी मंत्री भरणे यांनी दिले.

प्रचलित शासन निर्णयांच्या आधारे नियम निश्चित करावे

सेवा प्रवेश नियमांमध्ये शिक्षकवर्गीय पदांसाठी भारतीय कृषी अनुसंधान परिषद, नवी दिल्ली तसेच विद्यापीठ अनुदान आयोगाच्या नियमावली व मार्गदर्शक तत्वांचा विचार करण्यात आला आहे. त्याचबरोबर महाराष्ट्र कृषी विद्यापीठ अधिनियम, १९८३ आणि परिनियम, १९९० मधील तरतुदींचाही आधार घेण्यात आला आहे. शिक्षकेतर पदांसाठीही महाराष्ट्र कृषी विद्यापीठ अधिनियम व परिनियमांमधील तरतुदी तसेच प्रचलित शासन निर्णयांच्या आधारे सेवा प्रवेश नियम निश्चित केले जावे, असे  मंत्री भरणे यांनी सांगितले.

कृषी विद्यापीठांमध्ये एकसमान नियम

चारही कृषी विद्यापीठांमध्ये शिक्षक तसेच शिक्षकेतर कर्मचाऱ्यांसाठी सेवा प्रवेशाची प्रक्रिया अधिक स्पष्ट, पारदर्शक आणि गुणवत्ताधारित करण्याच्या दृष्टीने एकसमान नियम निश्चित करावे. सेवा प्रवेश प्रक्रियेत थेट भरती आणि पदोन्नती या दोन्ही मार्गांचा विचार करतांना, पात्रता, गुणवत्ता, ज्येष्ठता आणि संबंधित पदासाठी आवश्यक शैक्षणिक निकष यांचा योग्य समन्वय साधण्याचे निर्देशही मंत्री भरणे यांनी यावेळी दिले.

0000