बीड, दि. २१ (जिमाका) :- माती जपा, पाणी वाचवा आणि सुरक्षित महाराष्ट्र घडवा या संदेशाचा प्रसार करण्यासाठी बीड जिल्ह्यात आयोजित करण्यात आलेल्या महा वॉकेथॉन-वॉक फॉर वॉटर उपक्रमाला नागरिकांनी उत्स्फूर्त प्रतिसाद दिला आहे. भविष्यातील पिढ्यांसाठी सुपीक जमीन आणि पाण्याची शाश्वत व्यवस्था निर्माण करण्यासाठी शालेय विद्यार्थ्यांपासून ते ज्येष्ठांपर्यंत सर्वांनी जलसंधारणाच्या कामात सक्रिय योगदान देणे आता काळाची गरज बनली आहे, असे प्रतिपादन जिल्हाधिकारी विवेक जॉन्सन यांनी केले.
जिल्हा पोलिस मुख्यालयाच्या मैदानावरुन महा वॉकेथॉनला हिंरवी झेंडी दाखवून प्रारंभ करण्यात आला. यावेळी जलसंधारणचे कार्यकारी अभियंता सुरज लब्बा, जिल्हा क्रीडा अधिकारी अरविंद विद्यागर, जिल्हा अधिक्षक कृषी अधिकारी सुभाष साळवे, उपविभागीय जलसंधारण अधिकारी प्रशांत देशमुख, जलमित्र संजय शिंदे, जलमित्र अभिमान अवचार यांची प्रमुख उपस्थिती होती.
जिल्हाधिकारी विवेक जॉन्सन म्हणाले की, पाण्याचा प्रत्येक थेंब अनमोल असून जमिनीची सुपीकता टिकवून ठेवणे हे आपल्या सर्वांचे कर्तव्य आहे. अल निनोमुळे मान्सूनची प्रणाली कमकुवत झाल्याने भूजल पातळी खालावली आहे. त्यामुळे निसर्गाचा समतोल राखण्यासाठी आणि महाराष्ट्राला पाण्याच्या संकटापासून सुरक्षित ठेवण्यासाठी केवळ शासकीय पातळीवर नव्हे, तर लोकसहभागातून जलसंधारणाची चळवळ उभी राहणे आवश्यक आहे. त्यामुळे नागरिकांनी पाणी अडविण्यासोबतच त्याचा काटकसरीने वापर करण्याचा संकल्प आजच्या दिवशी करावा, असे आवाहनही त्यांनी यावेळी केले.
महा वॉकेथॉनच्या सुरुवातीस उपस्थित सर्वांना माजी मुख्यमंत्री स्व. सुधाकरराव नाईक यांच्या जलसंधारणातील उल्लेखनीय कामाचा आदर्श घेत त्यांची जयंती 21 ऑगस्ट हा जलसंधारण दिन म्हणुन साजरा करण्यात येत असून यावेळी जलसंधारणाची शपथ देण्यात आली. महाराष्ट्राला दुष्काळमुक्त करण्यासाठी माजी मुख्यमंत्री स्व. सुधाकरराव नाईक यांनी जलसंधारणाच्या क्षेत्रात ऐतिहासिक आणि क्रांतीकारी पावले उचलली होती. त्यांनी सुरू केलेले जलसंधारणाचे काम आजही राज्यासाठी दीपस्तंभ ठरत आहे. महा वॉकेथॉनच्या माध्यमातून आरोग्याचा संदेश देत असतानाच, राज्यापुढील पाण्याचे संकट दूर करण्यासाठी प्रत्येकाने पाण्याचा थेंब अन् थेंब वाचवला पाहिजे आणि जिरवला पाहिजे, हा संदेश या शपथविधीतून देण्यात आला.
महा वॉकेथॉन -वॉक फॉर वॉटर या रॅलीला पोलिस मुख्यालयाच्या मैदानावरुन प्रारंभ करण्यात आला त्यानंतर ही रॅली छत्रपती शिवाजी महाराज चौक मार्गे क्रीडा संकुलात जावून समारोप करण्यात आला. समारोप प्रसंगी सहभाग घेतलेल्यांना प्रमाणपत्राचे वाटप मान्यवरांच्या हस्ते करण्यात आले. या प्रसंगी शालेय विद्यार्थी, क्रीडा प्रेमी, नागरिक व संबंधित यंत्रणेचे अधिकारी-कर्मचारी मोठ्या संख्येने उपस्थित होते.
००००