पारोळा : टायगर इंटरनॅशनल स्कूलमध्ये हॉकीचे जादूगार म्हणून ओळखले जाणारे भारताचे महान खेळाडू मेजर ध्यानचंद यांच्या जयंतीनिमित्त राष्ट्रीय क्रीडा दिन मोठ्या उत्साहात व आनंदमय वातावरणात साजरा करण्यात आला.कार्यक्रमाच्या प्रारंभी मान्यवरांच्या हस्ते मेजर ध्यानचंद यांच्या प्रतिमेचे पूजन करण्यात आले. यावेळी संस्थेचे अध्यक्ष मा. रविंद्र पाटील, संचालिका मा. रुपाली पाटील, प्राचार्य मा. पी. एस. पाटील तसेच कार्यक्रमाचे प्रमुख पाहुणे एन. ई. एस हायस्कूलचे क्रीडाशिक्षक मा. सचिन पाटील उपस्थित होते.राष्ट्रीय क्रीडा दिनानिमित्त सीनियर नर्सरी ते इयत्ता सातवीपर्यंतच्या विद्यार्थ्यांसाठी विविध क्रीडा स्पर्धांचे आयोजन करण्यात आले होते. विद्यार्थ्यांनी मोठ्या उत्साहाने विविध स्पर्धांमध्ये सहभाग घेत आपल्या क्रीडा कौशल्याचे उत्कृष्ट प्रदर्शन केले.या स्पर्धांमध्ये कॅरम, हर्डल रेस, सॅक रेस, रनिंग रेस आणि रिले रेस यांसारख्या विविध स्पर्धा घेण्यात आल्या. तसेच मुले व मुलींसाठी स्वतंत्रपणे खो-खो आणि कबड्डीचे रोमांचक सामने आयोजित करण्यात आले होते. विद्यार्थ्यांनी शिस्त, सांघिक भावना आणि खिलाडूवृत्तीचे उत्कृष्ट दर्शन घडवून कार्यक्रमाची रंगत वाढविली.या सर्व क्रीडा स्पर्धांसाठी शाळेचे क्रीडा प्रशिक्षक रोहित विसपुते व निवेदित भंडागे यांचे विशेष मार्गदर्शन लाभले.यावेळी प्रमुख पाहुणे मा. सचिन पाटील यांनी विद्यार्थ्यांना मार्गदर्शन करताना खेळाचे जीवनातील महत्त्व स्पष्ट केले. नियमित खेळ व व्यायामामुळे शारीरिक तंदुरुस्तीबरोबरच मानसिक विकास, आत्मविश्वास आणि शिस्त वाढते, असे सांगून त्यांनी विद्यार्थ्यांना क्रीडा क्षेत्रात सक्रिय सहभाग घेण्याचे आवाहन केले.कार्यक्रमाच्या यशस्वी आयोजनासाठी प्री-स्कूल प्राचार्य अजीम शेख व उपप्राचार्य कविता सूर्यवंशी, स्कूल समन्वयक नम्रता बेडीस्कर, क्लार्क श्रीकांत खैरनार तसेच सर्व शिक्षक व शिक्षकेत्तर कर्मचारी यांनी विशेष परिश्रम घेतले. कार्यक्रमाचे प्रभावी सूत्रसंचालन काजल सिंधी व दर्शना पाटील यांनी केले.टायगर इंटरनॅशनल स्कूलमध्ये शिक्षणाबरोबरच विद्यार्थ्यांच्या सर्वांगीण विकासासाठी क्रीडा क्षेत्राला नेहमीच विशेष महत्त्व दिले जाते. राष्ट्रीय क्रीडा दिनानिमित्त आयोजित करण्यात आलेल्या या विविध स्पर्धांमुळे संपूर्ण शाळेचे वातावरण उत्साहपूर्ण, आनंदमय आणि क्रीडामय झाले होते.“खेळा, तंदुरुस्त राहा आणि यशाच्या दिशेने पुढे चला!”
