डॉ. पंजाबराव देशमुख कृषी विद्यापीठातील बारमाही रोजंदार मजुरांच्या प्रकरणाची सखोल तपासणी करा – मंत्री दत्तात्रय भरणे

मुंबई, दि. १ : डॉ. पंजाबराव देशमुख कृषी विद्यापीठ, अकोला येथील बारमाही रोजंदारी करणाऱ्या मजुरांना नियमित करण्याबाबत सर्व बाबी तपासून नियमानुसार कार्यवाही करावी, असे निर्देश कृषीमंत्री दत्तात्रय भरणे यांनी दिले.

मंत्रालयात डॉ. पंजाबराव देशमुख कृषी विद्यापीठ, अकोला येथील बारमाही रोजंदार मजुरांना अनुदानित असलेली पदे भरण्याबाबत आयोजित बैठकीत मंत्री भरणे बोलत होते. यावेळी कृषी विभागाच्या उपसचिव प्रतिभा पाटील, डॉ. पंजाबराव देशमुख कृषी विद्यापीठ, अकोला येथील बारमाही रोजंदार मजूर पवन देशमुख, अनंतकुमार शिरसाठ यांच्यासह सदस्य उपस्थित होते.

मंत्री भरणे म्हणाले की, डॉ. पंजाबराव देशमुख कृषी विद्यापीठ, अकोला येथील बारमाही रोजंदारी करणाऱ्या मजुरांची २०२५ मधील प्रचलित भरती प्रक्रिया, कर्मचारी योजना तसेच वेतन निश्चितीबाबत तपासणी करण्यात यावी. संबंधित प्रकरणाची सविस्तर चौकशी करून नियमाप्रमाणे कार्यवाही करण्यात यावी.

नियमित कर्मचारी तसेच कंत्राटी व मानधन तत्त्वावरील कर्मचाऱ्यांबाबत लागू असलेल्या नियमांची पडताळणी करून संबंधित नियुक्त्यांना सक्षम प्राधिकाऱ्याची मंजुरी आहे किंवा नाही, याची तपासणी करण्यात यावी. या प्रकरणात संबंधित अधिकारी व कर्मचाऱ्यांची जबाबदारी निश्चित करून विभागीय चौकशी करण्यात यावी असे निर्देशही कृषीमंत्री दत्तात्रय भरणे यांनी दिले.

0000

संध्या गरवारे/विसंअ