मुंबई, दि. ९ : मराठी भाषा, साहित्य आणि काव्यपरंपरेचा समृद्ध वारसा रसिकांपर्यंत पोहोचविण्याच्या उद्देशाने महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालय, मुंबई यांच्या सहयोगाने तसेच एनसीपीए ‘पेज टू स्टेज’ आणि ‘अक्षरकाव्य’ यांच्या संयुक्त विद्यमाने ‘उत्सव शब्दसुरांचा… ध्यास मराठीचा’ या विशेष मराठी कवितेच्या उत्सवाचे आयोजन करण्यात आले आहे.
गुरुवार, १० सप्टेंबर २०२६ रोजी सायं. ६.३० वाजता एनसीपीएच्या लिटल थिएटर येथे हा विशेष काव्य-सांगीतिक कार्यक्रम होणार आहे. मराठी साहित्यविश्वातील विविध कालखंडांतील मान्यवर कवींच्या काव्यरचनांचा स्वरमय आविष्कार या कार्यक्रमातून रसिकांना अनुभवता येणार आहे.
या कार्यक्रमामध्ये सुरेश भट, कुसुमाग्रज, विंदा करंदीकर, ग्रेस, बहिणाबाई चौधरी, शांताबाई शेळके, मंगेश पाडगावकर तसेच संत ज्ञानेश्वर यांच्या निवडक काव्यरचनांचे सादरीकरण करण्यात येणार आहे. मराठी कवितेतील भावविश्व, सामाजिक जाणिवा, प्रेम, निसर्ग, अध्यात्म आणि मानवी संवेदनांचा विविधांगी आविष्कार या कार्यक्रमातून रसिकांसमोर उलगडणार आहे.या विशेष कार्यक्रमात पल्लवी देशपांडे, सुप्रिया देशपांडे, शीतल देशपांडे आणि प्रज्ञा लाळींगकर हे कलाकार काव्यरचनांचे सादरीकरण करणार आहेत. त्यांना प्रमोद जाधव आणि संजय मायकेकर यांची साथसंगत लाभणार आहे. काव्य आणि संगीत यांच्या सुरेल मिलाफातून मराठी कवितेचा भावस्पर्शी अनुभव रसिकांना मिळणार आहे.
मराठी भाषेच्या साहित्यिक परंपरेत कवितेला अनन्यसाधारण स्थान आहे. संत साहित्यापासून आधुनिक मराठी कवितेपर्यंत विविध कवींच्या लेखणीतून मराठी समाजजीवन, संस्कृती, संवेदना आणि विचारविश्व समृद्ध झाले आहे. या समृद्ध काव्यपरंपरेची नव्या पिढीशी आणि व्यापक रसिकवर्गाशी नव्याने सांगड घालण्याच्या दृष्टीने ‘उत्सव शब्दसुरांचा… ध्यास मराठीचा’ हा उपक्रम महत्वपूर्ण ठरणार आहे.
हा सांस्कृतिक उपक्रम सांस्कृतिक कार्य, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता मंत्री ॲड. आशिष शेलार यांच्या संकल्पनेतून तसेच सांस्कृतिक कार्य विभागाच्या मार्गदर्शनाखाली आयोजित करण्यात आला आहे. मराठी भाषा, साहित्य, संगीत, नाट्य आणि विविध सांस्कृतिक कलाप्रकारांना व्यापक व्यासपीठ उपलब्ध करून देण्यासाठी सांस्कृतिक कार्य संचालनालयामार्फत विविध उपक्रम सातत्याने राबविण्यात येत आहेत.
कार्यक्रमासाठी प्रवेश विनामूल्य असून प्रथम येणाऱ्यास प्रथम प्राधान्य या तत्त्वावर प्रवेश देण्यात येणार आहे. इच्छुक रसिकांनी BookMyShow द्वारे नोंदणी करावी. कार्यक्रमाच्या प्रवेशासाठी एनसीपीए बॉक्स ऑफिसशी ०२२-६६२२३७५४ या क्रमांकावर संपर्क साधता येईल.
मराठी कविता, साहित्य आणि संगीताची आवड असलेल्या रसिकांनी मोठ्या संख्येने उपस्थित राहून ‘उत्सव शब्दसुरांचा… ध्यास मराठीचा’ या विशेष काव्य-सांगीतिक कार्यक्रमाचा आस्वाद घ्यावा, असे आवाहन सांस्कृतिक कार्य संचालनालयाचे संचालक प्रशांत खेडेकर यांनी केले आहे.
000
संजय ओरके/विसंअ
