अमरावती, दि. २६ (जिमाका): खरीप हंगाम २०२६ मधील पावसाची तूट आणि इतर प्रतिकूल परिस्थितीमुळे जिल्ह्यातील सर्व १४ तालुक्यांमध्ये शासनाने दुष्काळसदृश परिस्थिती घोषित केली आहे. मदत व पुनर्वसन विभागाने २५ सप्टेंबर २०२६ रोजी शासन निर्णय जारी करून जिल्ह्यात दुष्काळ संहितेच्या ‘ट्रिगर-१’ नुसार विविध उपाययोजना केल्या आहेत.
या निर्णयामुळे अमरावती, भातुकली, चांदूर रेल्वे, नांदगाव खंडेश्वर, धामणगाव रेल्वे, अचलपूर, अंजनगाव सुर्जी, तिवसा, धारणी, चिखलदरा, वरुड, मोर्शी, चांदुर बाजार आणि दर्यापूर या सर्व १४ तालुक्यांमधील शेतकऱ्यांना विविध सवलती आणि उपाययोजनांचा लाभ मिळणार आहे.
शासन निर्णयानुसार शेतकऱ्यांना सवलती मिळणार असून काही उपाययोजना करण्यात आल्या आहेत. यात जमीन महसूलात सूट व पीक कर्जाचे पुनर्गठन, शेतीशी निगडित कर्जाच्या वसुलीस स्थगिती, ७.५ हॉर्सपावरपेक्षा जास्त क्षमतेच्या कृषी पंपांच्या चालू वीजबिलात सूट, टंचाईग्रस्त काळात शेतकऱ्यांच्या शेती पंपाची वीज जोडणी खंडित न करणे, शालेय व महाविद्यालयीन विद्यार्थ्यांच्या परीक्षा शुल्कात माफी, ‘मनरेगा’ (रोहयो) अंतर्गत कामांच्या निकषात शिथिलता आणून जास्तीत जास्त कामे उपलब्ध करणे, तसेच आवश्यक तेथे पिण्याच्या पाण्याचे टँकर्स आणि जनावरांसाठी चारा-पाण्याची व्यवस्था आदी उपाययोजना करण्यात येणार आहे.
विहित कार्यपद्धती पूर्ण झाल्यानंतर शेतकऱ्यांना पिकांच्या नुकसानीपोटी आर्थिक मदतीसंदर्भात स्वतंत्र शासन निर्णय जारी केला जाणार आहे.
शासन निर्णयानुसार जिल्हाधिकाऱ्यांना तात्काळ पंचनामे करण्याचे निर्देश देण्यात आले आहे. त्यानुसार जिल्हाधिकारी आशिष येरेकर यांनी बाधित क्षेत्रांचे पंचनामे करण्याची प्रक्रिया तात्काळ सुरू करण्याचे आदेश दिले आहेत. सर्व्हेक्षण केलेल्या पिकांचे जीपीएस कोऑर्डिनेट व छायाचित्रांसह अहवाल कृषी आयुक्तांमार्फत शासनास सादर केला जाणार आहे.
०००००
