माजी अग्निवीरांना महाराष्ट्र शासकीय सेवेत १०% आरक्षण; शंभूराज देसाईंनी निर्णयाचे केले स्वागत

मुबंई – प्रतिनिधी , दि.२९ : भारतीय सैन्यात अग्निवीर म्हणून चार वर्षांची सेवा पूर्ण करून सेवामुक्त झालेल्या माजी अग्निवीरांना महाराष्ट्र शासनाच्या सेवेत संधी उपलब्ध करून देण्याचा महत्त्वपूर्ण निर्णय राज्य मंत्रिमंडळाच्या बैठकीत घेण्यात आला आहे.माजी सैनिक कल्याण मंत्री शंभूराज देसाई यांनी या निर्णयाचे स्वागत करत आनंद व्यक्त केला.राज्याचे मुख्यमंत्री देवेंद्र फडणवीस यांच्या अध्यक्षतेखाली आणि उपमुख्यमंत्री एकनाथ शिंदे यांच्या उपस्थितीत मंत्रालयात झालेल्या राज्य मंत्रिमंडळाच्या बैठकीत माजी अग्निवीरांसाठी राज्य शासकीय सेवेत १० टक्के समांतर आरक्षण देण्याचा निर्णय घेण्यात आला. चार वर्षांची लष्करी सेवा पूर्ण केलेल्या माजी अग्निवीरांना गट-कमधील गणवेशधारी सेवांमध्ये नियुक्तीची संधी मिळणार आहे.भारतीय सैन्यात चार वर्षे देशसेवा केलेल्या अग्निवीरांनी शिस्त, धैर्य, नेतृत्व आणि कर्तव्यनिष्ठेचा अनुभव संपादन केलेला आहे. त्यांच्या या अनुभवाचा उपयोग राज्याच्या सेवेत व्हावा आणि देशसेवेनंतर त्यांना रोजगाराची सक्षम संधी मिळावी, या उद्देशाने हा महत्त्वपूर्ण निर्णय घेण्यात आला आहे. माजी अग्निवीरांच्या कौशल्याला आणि सेवाभावाला शासनाकडून योग्य व्यासपीठ मिळेल, असे मंत्री शंभूराज देसाई यांनी सांगितले.माजी अग्निवीरांना राज्याच्या विविध गणवेशधारी सेवांमध्ये सामावून घेण्यासाठी आवश्यक धोरण निश्चित करण्यात आले आहे. या निर्णयामुळे सैन्यदलातील सेवा पूर्ण केल्यानंतर राज्याच्या प्रशासकीय आणि सुरक्षा व्यवस्थेत योगदान देण्याची संधी त्यांना मिळणार आहे.माजी सैनिक, शहीद सैनिकांचे कुटुंबीय आणि सैनिकांच्या कल्याणासाठी शासनाच्या विविध योजनांना गती देण्याच्या भूमिकेचा हा निर्णय पुढील टप्पा मानला जात आहे. माजी सैनिक कल्याण विभागाच्या माध्यमातून माजी सैनिकांच्या रोजगार, शिक्षण आणि कल्याणाशी संबंधित संधी वाढविण्यावर भर देण्यात येत आहे. राज्याच्या सेवेत माजी अग्निवीरांच्या अनुभवाचा उपयोग करून घेण्यासोबतच, देशासाठी सेवा बजावलेल्या या जवानांना त्यांच्या सेवेनंतर सन्मानजनक रोजगाराची संधी उपलब्ध करून देणे, हा या निर्णयामागील प्रमुख उद्देश आहे.