कामाठीपुरा पुनर्विकास प्रकल्प राज्यासाठी आदर्श ठरेल अशा पद्धतीने राबवावा – राज्यमंत्री डॉ. पंकज भोयर

मुंबई, दि. ७ : कामाठीपुरा पुनर्विकास प्रकल्प गृहनिर्माण क्षेत्रात राज्याला दिशादर्शक आणि आदर्श ठरेल अशा पद्धतीने राबवावा. हा प्रकल्प पूर्णत्वास नेण्यासाठी अधिकारी, लोकप्रतिनिधी आणि कामाठीपुरा विकास समितीच्या काही पदाधिकाऱ्यांचा समावेश असलेली समिती गठित करावी, असे निर्देश गृहनिर्माण राज्यमंत्री डॉ. पंकज भोयर यांनी दिले.

कामाठीपुरा विकास समितीच्या मागण्यांबाबत मंत्रालयात आयोजित बैठकीत राज्यमंत्री डॉ. भोयर यांनी आढावा घेतला. प्रकल्प पूर्ण करण्यासाठी शासन सर्व आवश्यक कार्यवाही करेल. विकास समितीच्या सर्व मागण्यांबाबत शासन सकारात्मक असून त्या पूर्ण करण्यासाठी कार्यवाही करण्यात येईल, असेही त्यांनी सांगितले. राज्यमंत्री डॉ. भोयर म्हणाले, पुनर्विकास प्रकल्पामध्ये येथील नागरिकांच्या मागण्या पूर्ण करण्यासाठी शासन सकारात्मक आहे. प्रकल्पाला पुढे नेण्यासाठी समितीने शासनासोबत समन्वयाने काम करावे. कायदे, नियमात जे बसेल तशा पद्धतीने सर्व मागण्या पूर्ण करण्याचा प्रयत्न करण्यात येईल.

यावेळी खासदार अरविंद सावंत, खासदार मिलिंद देवरा, आमदार अमीन पटेल, गृहनिर्माण विभागाचे अपर मुख्य सचिव असीम कुमार गुप्ता, मुंबई इमारत दुरुस्ती व पुनर्रचना मंडळाचे मुख्य कार्यकारी अधिकारी मिलिंद शंभरकर तसेच कामाठीपुरा विकास समितीचे पदाधिकारी उपस्थित होते.

०००००

निलेश तायडे/विसंअ