‘दिलखुलास’ कार्यक्रमात वनसंवर्धन आणि वन्यजीव संरक्षणाविषयी उपवनसंरक्षक धैर्यशील पाटील यांची विशेष मुलाखत

मुंबई, दि. ९ : माहिती व जनसंपर्क महासंचालनालय निर्मित ‘दिलखुलास’ कार्यक्रमात ‘वनसंवर्धन, वन्यजीव संरक्षण, मानव-वन्यजीव संघर्ष, जैवविविधतेचे जतन आणि वनपर्यटन’ या विषयावर कोल्हापूर प्रादेशिक वन विभागाचे उपवनसंरक्षक धैर्यशील पाटील यांची मुलाखत प्रसारित होणार आहे.

‘दिलखुलास’ कार्यक्रमात ही मुलाखत सोमवार १२, मंगळवार १३ आणि बुधवार १४ ऑक्टोबर २०२६ रोजी सकाळी ७.२५ ते ७.४० या वेळेत आकाशवाणीच्या सर्व केंद्रांवर आणि ‘News On AIR’ ॲपवर प्रसारित होणार आहे. मुलाखत कोल्हापूर विभागीय माहिती कार्यालयाच्या सहायक संचालक वृषाली पाटील यांनी घेतली आहे.

या मुलाखतीत वन्यजीव सप्ताहानिमित्त आयोजित उपक्रम, वृक्षलागवड व वनसंवर्धन, वन्यजीवांची शिकार रोखण्यासाठी करण्यात येणारी उपाययोजना आणि वन्यजीव संरक्षणासाठी नागरिकांचा सहभाग या विषयांवर माहिती देण्यात आली आहे. तसेच मानव आणि वन्यजीव यांच्यातील संघर्षाची कारणे, वन्य प्राणी मानवी वस्तीत आढळल्यास नागरिकांनी घ्यावयाची खबरदारी,  वनपर्यटनाचे महत्व तसेच भुदरगड तालुक्यातील सवतकडा धबधबा परिसरातील निसर्गरम्य पर्यटनस्थळांशी संबंधित बाबींचाही या मुलाखतीत समावेश आहे.

वनसंवर्धनात स्थानिक नागरिक आणि समित्यांची भूमिका, जंगलातील वणव्यांना प्रतिबंध करण्यासाठी घ्यावयाची काळजी, दुर्मिळ वनस्पती, पक्षी व वन्यजीवांचे संरक्षण आणि निसर्गसंपदा व जैवविविधतेचे जतन याविषयी दिलखुलास मधील या मुलाखतीत उपवनसंरक्षक धैर्यशील पाटील यांनी मार्गदर्शन केले आहे. निसर्गाचा समतोल राखण्यासाठी नागरिकांनी घ्यावयाची जबाबदारी आणि वनसंवर्धनातील लोकसहभागाचे महत्व यावरही यावेळी चर्चा करण्यात आली आहे.

000

जयश्री कोल्हे/ससं