लोककलेचा अस्सल बाज आणि अभिनयातील सहजता जपणारी ज्येष्ठ कलावंत हरपली – मंत्री ॲड. आशिष शेलार यांची ज्येष्ठ अभिनेत्री मधू कांबीकर यांना श्रद्धांजली

मुंबई, दि. १२ : महाराष्ट्राच्या समृद्ध लोककलेचा वारसा आपल्या नृत्यकौशल्याने आणि समर्थ अभिनयाने रुपेरी पडद्यावर अजरामर करणाऱ्या ज्येष्ठ अभिनेत्री मधू कांबीकर यांच्या निधनाने मराठी कला क्षेत्राची मोठी हानी झाली आहे. लावणीला आपल्या नृत्यशैलीतून नजाकत आणि प्रतिष्ठा मिळवून देणारी, तसेच लोककला, रंगभूमी आणि चित्रपट अशा विविध माध्यमांत आपल्या कलेचा ठसा उमटविणारी ज्येष्ठ कलावंत आपण गमावली आहे, अशा शब्दांत सांस्कृतिक कार्य मंत्री ॲड. आशिष शेलार यांनी मधू कांबीकर यांना भावपूर्ण श्रद्धांजली अर्पण केली.

मधू कांबीकर यांनी पारंपरिक लावणीचा अस्सल बाज जपत आपल्या नृत्यकौशल्याने या लोककलेला वेगळी उंची मिळवून दिली. कथ्थकच्या अभ्यासातून समृद्ध झालेली त्यांची नृत्यशैली, सहजसुंदर अदाकारी आणि वैविध्यपूर्ण भूमिकांना न्याय देणारा त्यांचा अभिनय ही त्यांच्या कलाप्रवासाची वैशिष्ट्ये होती. मराठी चित्रपटसृष्टीत त्यांनी साकारलेल्या भूमिका रसिकांच्या मनात कायम स्मरणात राहतील. त्यांच्या कलासाधनेतून लोककलेचा वारसा पुढील पिढ्यांपर्यंत पोहोचला. त्यांचे योगदान नव्या पिढीतील कलाकारांसाठी प्रेरणादायी राहील, अशा शब्दात ॲड. आशिष शेलार यांनी आपल्या भावना व्यक्त केल्या आहेत.

०००० 

संजय ओरके/विसंअ