शासकीय जमिनीवरील अतिक्रमणे नियमानुकूल करण्याच्या कार्यवाहीला गती द्यावी – मंत्री दादाजी भुसे

मालेगाव, दि. १६ : मालेगाव शहरातील शासकीय जमिनीवरील अतिक्रमणे शासनाच्या निकषांनुसार नियमानुकूल करण्याची प्रक्रिया गतिमान करावी. प्रलंबित प्रस्तावांची छाननी, जमिनींची मोजणी, मालकी हक्क पडताळणी आणि नियमानुकूलतेचे आदेश पारित झालेल्या प्रकरणांतील उतारे वितरणाची कार्यवाही तातडीने पूर्ण करावी, असे निर्देश शालेय शिक्षण मंत्री दादाजी भुसे यांनी दिले.

मालेगाव येथील शासकीय विश्रामगृहात आयोजित आढावा बैठकीत ते बोलत होते. बैठकीस अपर जिल्हाधिकारी हेमांगी पाटील, उपविभागीय अधिकारी नितीन सदगीर, महानगरपालिका उपायुक्त डॉ. सुनीता कुमावत, तहसीलदार विशाल सोनवणे, नगर भूमापन अधिकारी पंढरीनाथ चौधरी, वनपरिक्षेत्र अधिकारी गायत्री सोनवणे, सहाय्यक वनसंरक्षक अधिकारी शेखर तनपुरे, उपअभियंता सचिन माळवाळ यांच्यासह संबंधित विभागांचे अधिकारी उपस्थित होते.

मंत्री भुसे म्हणाले की, उपलब्ध अहवालानुसार, यापूर्वी २ हजार ७९८ अतिक्रमणधारकांची प्रकरणे नियमानुकूल करण्यात आली आहेत. तसेच ५०० चौरस फुटांपेक्षा अधिक क्षेत्रावरील ५०६ अतिक्रमणधारकांची स्वतंत्र यादी तयार करण्यात आली आहे. महसूल व वन विभागाच्या २५ मार्च २०२६ रोजीच्या शासन निर्णयानुसार म्हाळदे गावठाण, सोयगाव आणि द्याने गावठाण येथील ५४२ अतिक्रमणधारकांचे प्रस्ताव नव्याने सादर करण्यात आले आहेत.

या प्रस्तावांमध्ये निवासी व व्यावसायिक अतिक्रमणधारकांच्या स्वतंत्र याद्या तयार करून जमिनींची मोजणी येत्या आठवडाभरात पूर्ण करावी. तसेच यापूर्वी नियमानुकूलतेचे आदेश पारित झालेल्या ७५५ अतिक्रमणधारकांना उतारे वितरित करण्याची कार्यवाही तातडीने पूर्ण करावी, अशा सूचनाही त्यांनी दिल्या. संबंधित जमिनींचे अभिलेख, मालकी हक्क, आवश्यक ना-हरकत दाखले आणि मोजणीची प्रक्रिया पूर्ण करण्यासाठी महानगरपालिका, महसूल व भूमी अभिलेख विभागांनी समन्वयाने काम करावे. दरेगाव येथील संभाव्य वनक्षेत्रातील घरकुलांशी संबंधित समस्या महसूल विभाग, वन विभाग आणि महानगरपालिका यांनी परस्पर समन्वयातून सोडवाव्यात, असे निर्देशही मंत्री भुसे यांनी दिले.

000000