घाटकोपरमध्ये रंगणार ‘चातुर्मास भक्तिसंगम’ भक्तिसंगीताचा सुरेल कार्यक्रम

मुंबई, दि. ९ : भक्तिरसाने ओतप्रोत असलेल्या सुरेल गीतांच्या माध्यमातून भक्तिसंगीताचा आनंद देणारा ‘चातुर्मास भक्तिसंगम’ हा विशेष सांगीतिक कार्यक्रम शनिवार, १० ऑक्टोबर २०२६ रोजी सायंकाळी ६.३० वाजता झवेरबेन पोपटलाल सभागृह, घाटकोपर (पूर्व), मुंबई येथे आयोजित करण्यात आला आहे. सांस्कृतिक कार्य विभागांतर्गत सांस्कृतिक कार्य संचालनालय यांच्या वतीने या कार्यक्रमाचे आयोजन करण्यात आले आहे. मराठा प्रतिष्ठान हे कार्यक्रमाचे सादरकर्ते आहेत. या कार्यक्रमात गायिका मृण्मयी फाटक आणि गायक ओंकार बंडबे भक्तिगीते सादर करणार आहेत. भक्तिगीतांच्या माध्यमातून श्रद्धा, भक्तिभाव आणि संगीताचा सुरेल संगम अनुभवण्याची संधी रसिकांना मिळणार आहे. कार्यक्रमाचे निवेदन रश्मी आमडेकर करणार आहेत.

चातुर्मासाच्या भक्तिमय वातावरणात आयोजित या कार्यक्रमातून भक्तिसंगीताची परंपरा आणि त्यातील भावसौंदर्य रसिकांसमोर सादर केले जाणार आहे. भक्तिगीतांच्या सुरेल सादरीकरणामुळे कार्यक्रमाला विशेष रंगत येणार आहे. हा सांस्कृतिक उपक्रम सांस्कृतिक कार्य, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता मंत्री ॲड. आशिष शेलार यांच्या संकल्पनेतून तसेच सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली आयोजित करण्यात आला आहे. महाराष्ट्रातील संगीतपरंपरा, भक्तिसंगीत आणि सांस्कृतिक वारशाचे जतन, संवर्धन व प्रसार करण्यासाठी सांस्कृतिक कार्य संचालनालयामार्फत विविध सांस्कृतिक उपक्रम राबविण्यात येत आहेत.

रसिकांनी मोठ्या संख्येने उपस्थित राहून ‘चातुर्मास भक्तिसंगम’ या भक्तिसंगीताच्या कार्यक्रमाचा आनंद घ्यावा, असे आवाहन सांस्कृतिक कार्य संचालनालयाचे संचालक प्रशांत खेडेकर यांनी केले आहे.

000

संजय ओरके/विसंअ