दादरमध्ये रंगणार ‘जागर आदिशक्तीचा, सन्मान कर्तृत्वाचा’ सांस्कृतिक सोहळा

मुंबई, दि. १३: आदिशक्तीचा जागर आणि महिलांच्या कर्तृत्वाचा सन्मान करणारा ‘जागर आदिशक्तीचा, सन्मान कर्तृत्वाचा’ हा विशेष सांस्कृतिक कार्यक्रम मंगळवार, १३ ऑक्टोबर २०२६ रोजी सायंकाळी ७ वाजता छत्रपती शिवाजी महाराज नाट्यगृह, दादर, मुंबई येथे आयोजित करण्यात आला आहे. महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालय, महाराष्ट्र राज्य, मुंबई यांच्या वतीने या कार्यक्रमाचे आयोजन करण्यात आले असून, समर्थ सृष्टी फाउंडेशन हे कार्यक्रमाचे सादरकर्ते आहेत.

आदिशक्तीची उपासना, स्त्रीशक्तीचा गौरव आणि विविध क्षेत्रांत उल्लेखनीय कार्य करणाऱ्या महिलांच्या कर्तृत्वाचा सन्मान हा या कार्यक्रमाचा मुख्य आशय आहे. सांस्कृतिक सादरीकरणाच्या माध्यमातून महिला सक्षमीकरणाचा आणि स्त्रीशक्तीच्या गौरवाचा संदेश या उपक्रमातून देण्यात येणार आहे. या कार्यक्रमाला ‘महाराष्ट्राची हास्यजत्रा’ या लोकप्रिय कार्यक्रमातील अभिनेत्री व गायिका अक्षता सावंत यांची विशेष उपस्थिती असणार आहे. त्यांच्या उपस्थितीमुळे कार्यक्रमाला विशेष रंगत येणार आहे.

हा सांस्कृतिक उपक्रम सांस्कृतिक कार्य, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता मंत्री ॲड. आशिष शेलार यांच्या संकल्पनेतून तसेच सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली आयोजित करण्यात आला आहे. महाराष्ट्रातील सांस्कृतिक परंपरा, लोककला आणि विविध कलाप्रकारांचे जतन, संवर्धन व प्रसार करण्यासाठी सांस्कृतिक कार्य संचालनालयामार्फत सातत्याने विविध उपक्रम राबविण्यात येत आहेत.

कार्यक्रमाच्या प्रवेशिका नाट्यगृहात उपलब्ध आहेत. नागरिकांनी मोठ्या संख्येने उपस्थित राहून या सांस्कृतिक सोहळ्यात सहभागी व्हावे, असे आवाहन सांस्कृतिक कार्य संचालनालयाचे संचालक प्रशांत खेडेकर यांनी केले आहे.

००००
संजय ओरके/विसंअ