मतमोजणी केंद्रातील सुरक्षा सुविधांचा विभागीय आयुक्त जी. श्रीकांत यांच्याकडून आढावा

छत्रपती संभाजीनगर, दि. १३ :- औरंगाबाद विभाग पदवीधर मतदारसंघाच्या निवडणुकीचे निवडणूक निर्णय अधिकारी तथा विभागीय आयुक्त जी. श्रीकांत यांनी आज चिकलठाणा येथील कलाग्रामसमोरील मोकळ्या जागेत उभारण्यात आलेल्या मतमोजणी केंद्राची पाहणी करून सुरक्षा व्यवस्था व आवश्यक सुविधांचा आढावा घेतला.

यावेळी त्यांनी सीसीटीव्ही यंत्रणा, मतपेट्या ठेवण्याची व्यवस्था, मतमोजणी कक्ष, वीजपुरवठा व पर्यायी वीज व्यवस्था, अग्निशमन यंत्रणा, रुग्णवाहिका तसेच उमेदवारांच्या प्रतिनिधींसाठी उपलब्ध सुविधांची माहिती घेतली. मतमोजणी प्रक्रियेत वीजपुरवठ्यामुळे कोणताही व्यत्यय येऊ नये, यासाठी आवश्यक ती खबरदारी घेण्याच्या सूचना त्यांनी संबंधित अधिकाऱ्यांना दिल्या.

मतमोजणीच्या दिवशी अधिकारी, कर्मचारी व उमेदवारांच्या प्रतिनिधींना कोणतीही अडचण येऊ नये, यासाठी प्रवेश व्यवस्था, पिण्याचे पाणी, स्वच्छतागृहे आणि अन्य मूलभूत सुविधांची पूर्तता वेळेत करावी. तसेच सर्व संबंधित यंत्रणांनी समन्वयाने काम करून मतमोजणी केंद्रावरील आवश्यक व्यवस्था सज्ज ठेवावी, असे निर्देश त्यांनी दिले.

यावेळी जिल्हाधिकारी विनय गौडा जी. सी., जिल्हा परिषदेच्या मुख्य कार्यकारी अधिकारी मिन्नू पी. एम. महानगरपालिका आयुक्त अमोल ऐडगे, पोलीस आयुक्त प्रवीण पवार यांच्यासह निवडणुकीशी संबंधित अधिकारी उपस्थित होते.

००००