मुंबई, दि. १५ : भ्रष्टाचार निर्मूलन जनजागृतीसाठी राज्यात २६ ऑक्टोबर ते १ नोव्हेंबर २०२६ या कालावधीत ‘दक्षता जनजागृती सप्ताह’ साजरा करण्यात येणार आहे. या सप्ताहासाठी यावर्षी ‘समृद्धीसाठी सत्यनिष्ठा’ ही संकल्पना निश्चित करण्यात आली असून, सप्ताह कालावधीत राज्यभर विविध कार्यक्रमांचे आयोजन करण्यात येणार आहे.
सप्ताहात शासनाच्या सर्व विभागांमध्ये या अनुषंगाने जनजागृतीचे विविध उपक्रम राबविण्यात येणार आहेत. सप्ताहाची सुरुवात २६ ऑक्टोबर रोजी सकाळी ११ वाजता भ्रष्टाचार निर्मूलनाच्या प्रतिज्ञेने होणार असून, सर्व शासकीय कार्यालयांमध्ये ही प्रतिज्ञा घेण्यात येईल. त्यानंतर राज्यपाल आणि मुख्यमंत्री यांच्या संदेशाचे वाचन केले जाईल. तसेच हे संदेश राज्यातील जनतेपर्यंत विविध माध्यमांद्वारे पोहोचविण्यात येतील.
सप्ताहादरम्यान कार्यालयांच्या दर्शनी भागात तसेच सार्वजनिक ठिकाणी भ्रष्टाचाराविरोधी जनजागृतीचे बॅनर, पोस्टर आणि संदेश प्रदर्शित करण्यात येतील. जनजागृतीसाठी समाजमाध्यमांचाही वापर करण्यात येणार आहे. मुंबई, पुणे यासारख्या मोठ्या शहरांमधील मोक्याच्या ठिकाणी जनजागृती संदेश, व्हेरिएबल मेसेज सिस्टीम बोर्डद्वारे भ्रष्टाचार निर्मूलन जनजागृती विषयक संदेश प्रसारित करण्यात येतील. भ्रष्टाचाराच्या दुष्परिणामावर प्रकाश टाकण्यासाठी कार्यालये, शाळा, महाविद्यालयाच्या स्तरावर वादविवाद स्पर्धा, व्याख्याने, निबंध स्पर्धा, कार्यशाळा, चर्चासत्र, मुलाखती यांचेही आयोजन करण्यात येणार आहे. या बरोबरच भ्रष्टाचार निर्मूलनावर आधारित जनजागृती साहित्य व पुस्तकांचे प्रकाशन करण्यात येणार आहे.
राज्यातील अशासकीय संघटना, स्वयंसेवी संस्था, सामान्य नागरिकांना दक्षता जनजागृती मोहिमेत मोठ्या प्रमाणावर, उत्स्फूर्तपणे सहभागी होण्याकरीता आवाहन करण्यात यावे. त्याकरीता पथनाट्ये, नाटिका, काव्यवाचन, इ. नाविन्यपूर्ण व आकर्षक योजना, कार्यक्रमांची आखणी करणे, राज्य शासनाचे सर्व विभाग, विभाग प्रमुख व कार्यालय प्रमुखांनी त्यांच्या अधिनस्त कार्यालयात भ्रष्टाचार निर्मूलन जनजागृतीविषयक विविध स्पर्धा, व्याख्याने, निबंधस्पर्धा इ. उपक्रमांचे आयोजन करावे, असे आवाहन सामान्य प्रशासन विभागाने केले आहे.
००००
एकनाथ पोवार/ससं
