मुंबई, दि. ९ :- विविध शासकीय सेवा सहज उपलब्ध व्हाव्यात आणि नागरिकांची प्रलंबित कामे मार्गी लागावीत, या उद्देशाने ‘सेवा संकल्प अभियाना’अंतर्गत बृहन्मुंबई महानगरपालिकेच्या ‘सी’ विभाग कार्यालयात महाराजस्व शिबिर आयोजित करण्यात आले. नागरिकांनी या शिबिराला उत्स्फूर्त प्रतिसाद देत विविध सेवांचा लाभ घेतला.
मुंबई शहर जिल्हाधिकारी कार्यालय आणि महानगरपालिका प्रशासन यांच्या संयुक्त विद्यमाने आयोजित या शिबिरात मान्यवरांच्या हस्ते लाभार्थ्यांना विविध प्रमाणपत्रे वितरित करण्यात आली. यावेळी निवासी उपजिल्हाधिकारी डॉ. शिवनंदा लंगडापुरे, महानगरपालिकेचे सहाय्यक आयुक्त सुनील माने, तहसीलदार डॉ. मानसी मार्लेवार आणि संदीप आवारी, नगरसेवक आकाश पुरोहित आणि रिटा मकवाना उपस्थित होते. जिल्हाधिकारी कार्यालय व महानगरपालिकेचे अधिकारी-कर्मचारी तसेच लाभार्थी नागरिकही शिबिरात सहभागी झाले.
दाखले, प्रमाणपत्रे आणि शासकीय योजनांशी संबंधित प्रलंबित कामांचा निपटारा व्हावा, तसेच नागरिकांचा वेळ वाचावा, यासाठी शिबिरात व्यवस्था करण्यात आली होती. संबंधित विभागांच्या अधिकाऱ्यांनी सेवा मिळविण्याच्या प्रक्रियेबाबत नागरिकांना मार्गदर्शन केले. शिबिरात शासनाच्या विविध कल्याणकारी योजनांचीही माहिती देण्यात आली.
या उपक्रमात नोंदणी व मुद्रांक, नळ जोडणी, विद्युत जोडणी, आधार सेवा केंद्र, कर निर्धारण व संकलन, जन्म नोंदणी प्रमाणपत्र, शिधापत्रिका वितरण, विवाह नोंदणी प्रमाणपत्र, आधारकार्ड आणि दिव्यांग प्रमाणपत्राशी संबंधित सेवा उपलब्ध करून देण्यात आल्या. महापालिकेच्या अखत्यारितील विविध सेवांचाही याठिकाणी समावेश होता.
वीज जोडणीस मंजुरी, मालमत्ता हस्तांतरणानंतर वीज जोडणीच्या नोंदीमध्ये नवीन मालमत्ताधारकाचे नाव समाविष्ट करणे, जमिनीच्या नोंदी व मोजणीची कामे यांसाठीही संबंधित विभागांचे अधिकारी उपस्थित होते. नगर भूमापन व भूमी अभिलेख, बृहन्मुंबई महानगरपालिका, बेस्ट, आरटीओ, सामान्य प्रशासन, सामाजिक न्याय आणि नोंदणी विभागाच्या सेवांचा २९ नागरिकांना यावेळी लाभ देण्यात आला.
शिबिरादरम्यान निवासी उपजिल्हाधिकारी डॉ. शिवनंदा लंगडापुरे, सहाय्यक आयुक्त सुनील माने, तहसीलदार डॉ. मानसी मार्लेवार आणि संदीप आवारी, नगरसेवक आकाश पुरोहित आणि रिटा मकवाना यांनी प्रत्येक कक्षाला भेट दिली. नागरिकांना पुरविण्यात येणाऱ्या सेवांची माहिती घेऊन त्यांनी कामकाजाची पाहणी केली.
0000
