- विद्यार्थ्यांच्या आरोग्य व पोषणावर विशेष भर
मुंबई, दि. १३ : आदिवासी विद्यार्थ्यांचे आरोग्य सुदृढ राखून त्यांना निरोगी भविष्याची संधी उपलब्ध करून देण्यासाठी आदिवासी विकास विभागामार्फत आश्रमशाळांमध्ये ‘अॅनिमिया निवारण कार्यक्रम’ राबविण्यात येत आहे. या कार्यक्रमांतर्गत राज्यातील ३४९ शासकीय व अनुदानित आश्रमशाळा तसेच एकलव्य मॉडेल निवासी शाळांमधील एकूण १ लाख ३२ हजार ३५४ विद्यार्थ्यांची हिमोग्लोबिन तपासणी पूर्ण करण्यात आली असल्याची माहिती आदिवासी विकास विभागाच्या आयुक्त लीना बनसोड यांनी दिली.
आदिवासी विद्यार्थ्यांचा सर्वांगीण विकास साधताना शिक्षणासोबतच आरोग्य व पोषणाला प्राधान्य देण्यात येत आहे. त्याचाच भाग म्हणून राज्यातील २५६ शासकीय आश्रमशाळांमधील ८७ हजार ७५१, ८१ अनुदानित आश्रमशाळांमधील ४१ हजार ९३८ आणि १२ एकलव्य मॉडेल निवासी शाळांमधील २ हजार ६६५ विद्यार्थ्यांची हिमोग्लोबिन तपासणी करण्यात आली आहे. राज्यातील विविध विभागांमध्ये टप्प्याटप्प्याने ही मोहीम राबविण्यात येत असून, उर्वरित आश्रमशाळांमधील विद्यार्थ्यांची तपासणीही नियोजनबद्ध पद्धतीने पूर्ण करण्यात येणार आहे.
हिमोग्लोबिन तपासणीदरम्यान रक्तक्षय अर्थात अॅनिमियाची लक्षणे किंवा हिमोग्लोबिनची कमतरता आढळलेल्या विद्यार्थ्यांच्या आरोग्याची विशेष काळजी घेण्याच्या सूचना संबंधित शाळा प्रशासनाला देण्यात आल्या आहेत. विद्यार्थ्यांच्या आरोग्यस्थितीनुसार आवश्यक वैद्यकीय सल्ला व उपचार उपलब्ध करून देणे, त्यांच्या आहारात पोषणमूल्यांनी समृद्ध पदार्थांचा समावेश करणे, तसेच गरजेनुसार पूरक आहार देणे यावर भर देण्यात येत आहे. विद्यार्थ्यांच्या आरोग्याचा नियमित आढावा घेऊन रक्तक्षयाचे प्रमाण कमी करण्यासाठी आवश्यक उपाययोजना करण्यात येत आहेत.
विभागनिहाय हिमोग्लोबिन तपासणी
नाशिक विभाग – ६५ हजार ६७५ विद्यार्थी
ठाणे विभाग – ५४ हजार ९७४ विद्यार्थी
नागपूर विभाग – ७ हजार ४६३ विद्यार्थी
अमरावती विभाग – ४ हजार २४२ विद्यार्थी
आदिवासी विद्यार्थ्यांचे आरोग्य सुदृढ राखणे आणि त्यांना निरोगी भविष्याची संधी उपलब्ध करून देणे, हे विभागाचे महत्वाचे उद्दिष्ट आहे. अॅनिमिया निवारण कार्यक्रमाच्या माध्यमातून विद्यार्थ्यांच्या हिमोग्लोबिन पातळीची तपासणी करून कमतरता आढळलेल्या विद्यार्थ्यांसाठी आवश्यकतेनुसार पुढील उपचार व पोषणविषयक उपाययोजना करण्यात येत आहेत, असे आयुक्त लीना बनसोड यांनी सांगितले
0000
अश्विनी पुजारी/विसंअ
