नागरिकांना अखंडित आणि योग्य दाबाने वीजपुरवठा करा – पालकमंत्री भरत गोगावले

रायगड-अलिबाग, दि.१२: जिल्ह्यातील नागरिकांना अखंडितपणे, योग्य दाबाने आणि विनाअडथळा वीजपुरवठा होण्यासाठी विद्युत वितरणाची कामे प्राधान्याने पूर्ण करावीत. वाढती विजेची मागणी लक्षात घेऊन रोहित्रांची क्षमता वाढवावी, आवश्यकतेनुसार नवीन विद्युत उपकेंद्रे प्रस्तावित करावीत आणि दुर्गम तसेच डोंगराळ भागातील नागरिकांनाही नियमित वीजपुरवठा होईल, याची दक्षता घ्यावी. विद्युत वितरणाबाबत नागरिकांच्या तक्रारी उद्भवणार नाहीत, यासाठी यंत्रणेने तत्परतेने काम करावे, असे निर्देश फलोत्पादन मंत्री तथा पालकमंत्री भरत गोगावले यांनी दिले.

जिल्हाधिकारी कार्यालयातील राजस्व सभागृहात विद्युत वितरण कंपनीच्या कामकाजाचा आढावा घेताना ते बोलत होते. यावेळी आमदार महेंद्र दळवी, जिल्हा परिषद उपाध्यक्ष मधुकर पाटील, शिक्षण सभापती चंद्रकांत कळंबे, जिल्हाधिकारी किशन जावळे, मुख्य कार्यकारी अधिकारी श्रीमती नेहा भोसले, जिल्हा पोलीस अधीक्षक ऑचल दलाल, अपर जिल्हाधिकारी सचिन ढोले, आपत्ती व्यवस्थापन अधिकारी सागर पाठक उपस्थित होते.

रोहित्रांची क्षमता वाढवा; नवीन उपकेंद्रांचे नियोजन करा

वाढत्या वीजवापरामुळे विजेची मागणी वाढली असून, अनेक ठिकाणी रोहित्रांवरील अतिरिक्त भारामुळे नागरिकांना कमी दाबाने वीजपुरवठा होत आहे. ही परिस्थिती लक्षात घेऊन आवश्यकतेनुसार रोहित्रांची संख्या आणि क्षमता वाढवावी, जुनी व अकार्यक्षम रोहित्रे बदलावीत आणि जिल्ह्यात नवीन विद्युत उपकेंद्रांची आवश्यकता तपासून प्रस्ताव सादर करावेत. उद्योगांना वीजपुरवठा करतानाच स्थानिक नागरिकांच्या गरजांकडेही तितकेच लक्ष द्यावे. दुर्गम भागातील नागरिकांना अखंडित वीजपुरवठा मिळण्यासाठी विशेष उपाययोजना कराव्यात, असे पालकमंत्री म्हणाले.

स्मार्ट मीटरच्या तक्रारींचे तातडीने निराकरण करा

स्मार्ट मीटरमुळे वीजदेयके अधिक येत असल्याच्या नागरिकांच्या तक्रारी प्राप्त होत आहेत. या तक्रारींची गांभीर्याने शहानिशा करून वस्तुस्थिती तपासावी आणि योग्य कार्यवाहीद्वारे त्यांचे तातडीने निराकरण करावे. रस्त्यालगत असलेल्या रोहित्रांमुळे अपघात होण्याची शक्यता लक्षात घेऊन सर्वेक्षण करावे आणि आवश्यकतेनुसार रोहित्रे सुरक्षित ठिकाणी स्थलांतरित करावीत. पडलेले विद्युत खांब, जीर्ण झालेल्या तारा आणि धोकादायक विद्युत यंत्रणेची तातडीने दुरुस्ती करून संभाव्य अपघात टाळावेत, असे निर्देश त्यांनी दिले.

सौरऊर्जा योजनांना गती; 100 आदिवासी वाड्या सौरऊर्जेने उजळणार

शासनाच्या विद्युत वितरणविषयक विविध योजनांचा लाभ समाजातील शेवटच्या घटकापर्यंत पोहोचवावा. ‘मागेल त्याला सौर कृषी पंप’ योजना, भूमिगत विद्युत वाहिन्या आणि इतर योजनांच्या अंमलबजावणीला गती द्यावी. जिल्ह्यातील १०० आदिवासी वाड्या सौरऊर्जेच्या माध्यमातून सुसज्ज करण्यासाठी आवश्यक नियोजन करावे. तसेच, प्रधानमंत्री सूर्यघर योजनेची प्रभावी अंमलबजावणी करून सौरऊर्जेचा वापर वाढविण्यावर भर द्यावा. नवीन सविस्तर प्रकल्प अहवालांच्या (डीपीआर) अनुषंगाने प्रस्तावित कामांचा आढावा घेऊन आवश्यक कार्यवाही करावी, असेही त्यांनी सांगितले.

पाणीपुरवठा योजनांना प्राधान्य

जिल्ह्यातील दुष्काळसदृश परिस्थिती लक्षात घेऊन पिण्याच्या पाण्याच्या योजनांना आवश्यकतेनुसार विद्युत जोडणी आणि अखंडित वीजपुरवठा उपलब्ध करून द्यावा. विशेषतः डोंगराळ भागातील संभाव्य टंचाईग्रस्त गावांपर्यंत पाणी पोहोचविणाऱ्या योजनांना प्राधान्य द्यावे. पाणीपुरवठा योजनांमध्ये विजेअभावी अडथळे निर्माण होणार नाहीत, यासाठी संबंधित यंत्रणांनी समन्वयाने काम करावे. जिल्ह्यातील विद्युत वितरण व्यवस्था अधिक सक्षम करून नागरिकांना योग्य दाबाने आणि विनाअडथळा वीजपुरवठा मिळेल, याची जबाबदारी संबंधित अधिकाऱ्यांनी घ्यावी, असे पालकमंत्री भरत गोगावले यांनी स्पष्ट केले.

बैठकीस सर्व संबंधित विभागाचे प्रमुख अधिकारी उपस्थित होते.

000000000