पाणीपुरवठा योजनांची अपूर्ण कामे तातडीने पूर्ण करा; टँकर हा शेवटचा पर्याय ठेवा – मंत्री गुलाबराव पाटील
- टँकरच्या डिजिटल ट्रॅकिंग प्रणालीद्वारे पारदर्शकतेवर भर
मुंबई, दि. १३ : पाणीटंचाईची परिस्थिती लक्षात घेता, पाणीपुरवठा योजनांची अपूर्ण कामे तातडीने पूर्ण करून ती कार्यान्वित करावीत. टँकरद्वारे पाणीपुरवठा हा पहिला पर्याय नसून शेवटचा पर्याय असला पाहिजे. त्यासाठी उपलब्ध जलस्रोतांचा प्रभावी वापर करून नागरिकांना नियमित पाणीपुरवठा करण्याचे नियोजन करावे, असे निर्देश पाणीपुरवठा व स्वच्छतामंत्री गुलाबराव पाटील यांनी दिले.
मंत्रालयात पाणीटंचाईच्या अनुषंगाने नेवासा विधानसभा मतदारसंघाचा आढावा घेण्यात आला. यावेळी नेवासाचे आमदार विठ्ठलराव लंघे, पाणीपुरवठा विभागाचे संबंधित अधिकारी तसेच दूरदृश्य प्रणालीद्वारे अहिल्यानगर जिल्हा परिषद मुख्य कार्यकारी अधिकारी व संबधित अधिकारी उपस्थित होते.
मंत्री गुलाबराव पाटील यांनी सांगितले की, ज्या पाणीपुरवठा योजनांची कामे ७५ ते ९९ टक्क्यांपर्यंत पूर्ण झाली आहेत, त्या योजनांमधील वीज जोडणी, पाइपलाइन जोडणी, किरकोळ दुरुस्ती तसेच निधीअभावी प्रलंबित असलेली कामे तातडीने पूर्ण करावीत. नियमित निधी मिळण्यास विलंब होत असल्यास आवश्यकतेनुसार टंचाई निवारण आराखड्यातून निधी उपलब्ध करून ही कामे मार्गी लावावीत. यामुळे संबंधित योजना लवकर कार्यान्वित होऊन टँकरवरील अवलंबित्व कमी होण्यास मदत होईल.
नेवासा विधानसभा मतदारसंघातील पाणीपुरवठा योजनांचा आढावा घेताना प्रलंबित १८ योजनांपैकी १६ रेट्रोफिटिंग योजनांची कामे प्राधान्याने पूर्ण करण्याच्या सूचना त्यांनी दिल्या. संबंधित अधिकाऱ्यांनी डिसेंबर किंवा जानेवारीपर्यंत उर्वरित कामे युद्धपातळीवर पूर्ण करून गावांना नियमित पाणीपुरवठा सुरू करण्यासाठी कालबद्ध नियोजन करावे, असेही त्यांनी निर्देशित केले.
टँकरच्या संख्येतील वाढीची वस्तुस्थिती तपासा
टँकरद्वारे पाणीपुरवठा करताना पारदर्शकता राखणे आणि संभाव्य गैरव्यवहार रोखणे आवश्यक आहे. यासाठी टँकरच्या फेऱ्यांची नोंद, प्रत्यक्ष पाणीपुरवठा आणि वितरण यावर नियंत्रण ठेवणारी डिजिटल ट्रॅकिंग ॲप प्रणाली लागू करण्याबाबत बैठकीत भर देण्यात आला. प्रत्यक्ष गरजेनुसारच टँकरचे नियोजन करावे, असे निर्देशही देण्यात आले.
पर्यायी उपाययोजनांना प्राधान्य
पाणीटंचाईच्या काळात थेट टँकर सुरू करण्याऐवजी आवश्यकतेनुसार विहिरींचे अधिग्रहण, तात्पुरत्या नळयोजना व पाइपलाइनची कामे, विहिरींचे खोलीकरण, गाळ काढणे तसेच आडवे बोअर घेणे यांसारख्या पर्यायी उपाययोजना प्राधान्याने राबवाव्यात. उपलब्ध पाणीस्रोतांचा योग्य वापर करून टंचाईग्रस्त गावांना शाश्वत व नियमित पाणीपुरवठा करण्यासाठी संबंधित विभागांनी समन्वयाने कार्यवाही करावी, असे मंत्री गुलाबराव पाटील यांनी सांगितले.
0000
मोहिनी राणे/स.सं
