प्राथमिक दूध संस्थांच्या चेअरमन कार्यशाळेत आमदार ॲड. अमोलदादा पाटील यांचे मार्गदर्शन

“दूध उत्पादक शेतकऱ्यांच्या हितासाठी दूध संस्थांनी अधिक सक्षम आणि पारदर्शकपणे काम करावे” — आमदार ॲड. अमोलदादा पाटील

पारोळा : जळगाव जिल्हा सहकारी दूध उत्पादक संघ मर्यादित, जळगाव यांच्या वतीने पारोळा शहरातील पंकज बँक्वेट हॉल येथे पारोळा, अमळनेर व भडगाव तालुक्यातील प्राथमिक दूध संस्थांच्या मा. चेअरमन यांच्यासाठी विशेष कार्यशाळेचे आयोजन करण्यात आले. एरंडोल विधानसभा मतदारसंघाचे आमदार मा. ॲड. अमोलदादा पाटील यांच्या अध्यक्षतेखाली ही कार्यशाळा उत्साहपूर्ण वातावरणात संपन्न झाली.जिल्ह्यातील प्राथमिक दूध उत्पादक संस्थांच्या माध्यमातून दूध संकलन व्यवस्था अधिक सक्षम करणे, दूध उत्पादक शेतकऱ्यांना भेडसावणाऱ्या विविध अडचणी जाणून घेणे, दूध संकलनात वाढ करणे तसेच जळगाव जिल्हा दूध संघासमोरील विविध आव्हानांवर सकारात्मक चर्चा करून त्यावर प्रभावी उपाययोजना करण्याच्या उद्देशाने या कार्यशाळेचे आयोजन करण्यात आले होते.यावेळी मार्गदर्शन करताना आमदार ॲड. अमोलदादा पाटील म्हणाले की, “दूध उत्पादक शेतकरी हा संपूर्ण दुग्ध व्यवसायाचा केंद्रबिंदू आहे. प्राथमिक दूध संस्थेपासून ते दूध संघापर्यंतची संपूर्ण व्यवस्था अधिक सक्षम झाली, तर त्याचा थेट फायदा दूध उत्पादक शेतकऱ्यांना मिळणार आहे. त्यामुळे प्रत्येक दूध संस्थेच्या चेअरमन व संचालक मंडळाने संस्थेच्या कामकाजात पारदर्शकता, शिस्त आणि कार्यक्षमतेला प्राधान्य देत दूध संकलन वाढीसाठी प्रयत्न करणे गरजेचे आहे.”“ग्रामीण अर्थव्यवस्थेला बळकटी देण्यामध्ये दुग्ध व्यवसायाची भूमिका अत्यंत महत्त्वाची आहे. अनेक शेतकरी शेतीसोबत दुग्ध व्यवसायावर आपला उदरनिर्वाह करतात. त्यामुळे दूध उत्पादकांना योग्य दर, वेळेवर पेमेंट, आवश्यक सुविधा आणि संस्थेच्या माध्यमातून मिळणाऱ्या योजनांचा लाभ मिळवून देण्यासाठी आपण सर्वांनी एकत्रितपणे काम केले पाहिजे. प्राथमिक दूध संस्था ही शेतकरी आणि दूध संघ यांच्यातील महत्त्वाची कडी आहे. ही कडी मजबूत झाली तर संपूर्ण दुग्धव्यवस्था अधिक भक्कम होईल,” असेही आमदारांनी सांगितले.तसेच दूध संकलनाची गुणवत्ता वाढविणे, संस्थांचे कामकाज अधिक गतिमान करणे, दूध उत्पादकांची संख्या व दूध संकलन वाढविणे, आधुनिक तंत्रज्ञानाचा वापर करणे आणि दूध संस्थांच्या माध्यमातून शेतकऱ्यांना अधिकाधिक सुविधा उपलब्ध करून देण्याबाबतही आमदार ॲड. अमोलदादा पाटील यांनी उपस्थित चेअरमन यांना मार्गदर्शन केले.या कार्यशाळेत शिवसेनेचे जिल्हाप्रमुख वासुदेव पाटील, जिल्हा दूध संघाचे संचालक तथा जिल्हा बँकेचे चेअरमन संजयजी पाटील, दूध संघाचे संचालक परागदादा मोरे, रावसाहेब भोसले, दगडू चौधरी, यांचेसह दुध संघाचे कार्यकारी अधिकारी, अधिकारी, कर्मचारी, पारोळा, अमळनेर व भडगाव तालुक्यातील प्राथमिक दूध संस्थांचे चेअरमन, पदाधिकारी व संबंधित प्रतिनिधी मोठ्या संख्येने उपस्थित होते. उपस्थित मान्यवरांनी दूध उत्पादकांच्या समस्या, दूध संकलनातील अडचणी तसेच संस्थांच्या माध्यमातून भविष्यात करता येणाऱ्या विविध उपाययोजनांबाबत चर्चा केली.दूध उत्पादक शेतकऱ्यांच्या हिताला सर्वोच्च प्राधान्य देत प्राथमिक दूध संस्थांना सक्षम करण्यासाठी आणि दुग्ध व्यवसायाला अधिक बळकटी देण्यासाठी आवश्यक ते सर्व सहकार्य केले जाईल, अशी ग्वाही आमदार ॲड. अमोलदादा पाटील यांनी यावेळी दिली.कार्यशाळेच्या माध्यमातून पारोळा, अमळनेर व भडगाव तालुक्यातील दूध संस्थांच्या पदाधिकाऱ्यांना एकत्रित व्यासपीठ मिळाले असून, दूध संकलन वाढीसह दूध उत्पादक शेतकऱ्यांच्या हितासाठी नव्या दिशेने काम करण्याचा सकारात्मक संदेश या कार्यशाळेतून देण्यात आला.

- Advertisement -