मुंबई, दि. ५ : डॉ. श्यामाप्रसाद मुखर्जी यांच्या १२५ व्या जयंतीनिमित्त त्यांना आदरांजली अर्पण करण्यासाठी ‘राष्ट्रनायक डॉ. श्यामाप्रसाद मुखर्जी – नाट्य, साकारलेला ज्वलंत इतिहास…’ या नाट्याविष्काराचे आयोजन शनिवार, १७ ऑक्टोबर २०२६ रोजी रात्री ९ वाजता रवींद्र नाट्य मंदिर, प्रभादेवी, मुंबई येथे करण्यात आले आहे. महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालय, महाराष्ट्र राज्य, मुंबई यांच्या वतीने हा कार्यक्रम आयोजित करण्यात आला आहे.
ज्योति जेलिया कृत या नाट्यप्रयोगातून डॉ. श्यामाप्रसाद मुखर्जी यांच्या जीवनकार्याचा आणि ऐतिहासिक योगदानाचा नाट्यमय आविष्कार रसिकांसमोर साकारला जाणार आहे. इतिहासातील महत्त्वपूर्ण व्यक्तिमत्त्वाचे जीवन, विचार आणि कार्य नाट्यरूपातून प्रभावीपणे मांडण्याचा प्रयत्न या प्रयोगातून करण्यात येणार आहे. या नाट्याविष्काराची संकल्पना व दिग्दर्शन सज्जाद हुसैन खान (एन.एस.डी.) यांचे असून, प्रकाश परिकल्पना चिन्मय दास (एन.एस.डी.) यांची आहे. जयेश मेस्त्री यांनी मराठी अनुवाद केला असून, ज्योति आर्टस ग्रुप या नाट्यप्रयोगाचे सादरीकरण करणार आहे.
हा सांस्कृतिक उपक्रम सांस्कृतिक कार्य, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता मंत्री ॲड. आशिष शेलार यांच्या संकल्पनेतून तसेच सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली आयोजित करण्यात आला आहे. सांस्कृतिक कार्य संचालनालयामार्फत विविध सांस्कृतिक कलाप्रकारांना प्रोत्साहन देतानाच ऐतिहासिक, सामाजिक आणि सांस्कृतिक विषयांवर आधारित दर्जेदार नाट्यप्रयोग रसिकांपर्यंत पोहोचविण्यासाठी विविध उपक्रम राबविण्यात येत आहेत.
सांस्कृतिक कार्य संचालनालयाचे संचालक प्रशांत खेडेकर यांच्या नेतृत्वाखाली या नाट्यप्रयोगाचे आयोजन करण्यात आले आहे. मुंबईतील रसिकांनी मोठ्या संख्येने उपस्थित राहून ‘राष्ट्रनायक डॉ. श्यामाप्रसाद मुखर्जी’ या नाट्याविष्काराचा अनुभव घ्यावा, असे आवाहन त्यांनी केले आहे.
0000
संजय ओरके/विसंअ
