‘विकसित भारत’ संकल्पनेतून विद्यार्थ्यांच्या कलागुणांना हक्काचे व्यासपीठ आणि नवी दिशा – मंत्री चंद्रकांत(दादा) पाटील

मुंबई, दि. १२ : ‘विकसित भारत’ या संकल्पनेतून आयोजित करण्यात आलेल्या चित्रकला प्रदर्शनामुळे राज्यातील महाविद्यालयीन विद्यार्थ्यांच्या कलागुणांना हक्काचे व्यासपीठ मिळाले असून, त्यांच्या सर्जनशीलतेला आणि कलात्मक अभिव्यक्तीला नवी दिशा मिळणार असल्याचे प्रतिपादन उच्च व तंत्रशिक्षण मंत्री चंद्रकांत(दादा) पाटील यांनी केले.

प्रधानमंत्री नरेंद्र मोदी यांच्या संवैधानिक पदावरील कारकिर्दीला २५ वर्षे पूर्ण झाल्यानिमित्त ‘सेवा परमो धर्म:’ या उक्तीनुसार राज्यात १७ सप्टेंबर ते १७ ऑक्टोबर २०२६ या कालावधीत ‘सेवा संकल्प अभियान २०२६’ राबविण्यात येत आहे. या अभियानांतर्गत उच्च व तंत्रशिक्षण विभाग, कला संचालनालय, महाराष्ट्र राज्य आणि महाराष्ट्र राज्य कला शिक्षण मंडळ, यांच्या संयुक्त विद्यमाने आयोजित राज्यस्तरीय महाविद्यालयीन चित्रकला स्पर्धेतील उत्कृष्ट कलाकृतींच्या प्रदर्शनाचे उद्घाटन तसेच गुणवंत विद्यार्थ्यांचा पुरस्कार वितरण समारंभ उच्च व तंत्रशिक्षण मंत्री चंद्रकांत(दादा) पाटील यांच्या हस्ते सर जे. जे. कला महाविद्यालय येथे झाला.

या कार्यक्रमाला सर जे. जे. स्कूल ऑफ आर्ट, आर्किटेक्चर अँड डिझाइन विद्यापीठाचे कुलगुरू डॉ. हिम चॅटर्जी, महाराष्ट्र राज्य कला संचालनालयाचे संचालक डॉ. किशोर इंगळे, महाराष्ट्र राज्य कला शिक्षण मंडळाचे संचालक विनोद दांडगे, वास्तुविशारद राजीव मिश्रा यांच्यासह विद्यार्थी आणि संबंधित अधिकारी उपस्थित होते.

‘सेवा संकल्प अभियान २०२६’ अंतर्गत आयोजित हा उपक्रम विद्यार्थ्यांमधील कलात्मक अभिव्यक्ती, सर्जनशीलता आणि कला क्षेत्राविषयीची आवड वृद्धिंगत करण्यासाठी महत्वपूर्ण ठरणार आहे. या प्रदर्शनाच्या माध्यमातून राज्यातील नवोदित कलाकारांना प्रोत्साहन मिळेल आणि त्यांच्या कलात्मक वाटचालीला नवी दिशा मिळेल, असा विश्वासही मंत्री चंद्रकांत(दादा) पाटील यांनी व्यक्त केला.

विद्यार्थ्यांच्या सर्जनशीलतेला राज्यस्तरीय व्यासपीठ

या राज्यस्तरीय चित्रकला स्पर्धेत महाराष्ट्रातील शासकीय, अनुदानित आणि विनाअनुदानित महाविद्यालयांतील विद्यार्थ्यांनी उत्स्फूर्त सहभाग नोंदविला. विद्यार्थ्यांनी आपल्या कल्पकतेचा, सर्जनशीलतेचा आणि कलात्मक अभिव्यक्तीचा आविष्कार घडवत विविध विषयांवर उत्कृष्ट कलाकृती साकारल्या. या कलाकृतींमधून निवडलेल्या उत्कृष्ट कलाकृतींच्या निर्मात्या गुणवंत विद्यार्थ्यांना प्रथम, द्वितीय आणि तृतीय पारितोषिकांसह पाच प्रोत्साहनपर पारितोषिके प्रदान करून गौरविण्यात आले. यावेळी उच्च व तंत्रशिक्षण मंत्री चंद्रकांत(दादा) पाटील म्हणाले, नवोदित कलाकारांना आपल्या कलाकृती व्यापक स्तरावर सादर करण्याची संधी उपलब्ध करून देणे, तसेच कला क्षेत्रातील विद्यार्थ्यांना त्यांच्या भावी वाटचालीसाठी प्रेरणा देणे, हा या उपक्रमाचा मुख्य उद्देश आहे.”

१६ ऑक्टोबरपर्यंत प्रदर्शन सर्वांसाठी खुले

सर जे. जे. कला महाविद्यालय, मुंबई येथे आयोजित हे चित्रकला प्रदर्शन शनिवार, १७ ऑक्टोबर २०२६ सर्वांसाठी खुले राहणार आहे. प्रदर्शनाची वेळ दररोज सकाळी ११ ते सायंकाळी ५ वाजेपर्यंत असून, कलाप्रेमी, विद्यार्थी आणि नागरिकांनी या प्रदर्शनाला भेट देऊन विद्यार्थ्यांच्या कलाकृतींचा आस्वाद घ्यावा.

0000

काशीबाई थोरात/विसंअ