श्रीवर्धन शहरातील पाणीपुरवठ्याचे काटेकोर नियोजन करा – मंत्री आदिती तटकरे

मुंबई, दि. १३ : श्रीवर्धन शहरासह रानवली धरणावर अवलंबून असलेल्या ग्रामीण भागातील गावांच्या पिण्याच्या पाण्याचा प्रश्न लक्षात घेता, उपलब्ध पाणीसाठ्याचा काटकसरीने वापर करून पाणीपुरवठ्याचे काटेकोर नियोजन करावे. असे निर्देश महिला व बालविकास मंत्री आदिती तटकरे यांनी दिले.

श्रीवर्धन शहरातील पाणीपुरवठा रानवली धरणावर अवलंबून असलेली पाणी योजना व उपलब्ध पाणीसाठ्याचे नियोजन करण्याच्या अनुषंगाने मंत्रालयात मंत्री आदिती तटकरे यांच्या अध्यक्षतेखाली आढावा बैठक झाली. यावेळी रायगडचे जिल्हाधिकारी, आणि मुख्य कार्यकारी अधिकारी यांनी दूरदृश्यप्रणालीद्वारे सहभाग घेतला, तर जलसंपदा विभाग, ग्रामीण पाणीपुरवठा विभागाचे तसेच संबंधित अधिकारी मंत्रालयात उपस्थित होते.

महिला व बालविकास मंत्री आदिती तटकरे म्हणाल्या की, संभाव्य दुष्काळसदृश परिस्थितीचा विचार करून धरणातील पाण्याची गळती रोखणे, नादुरुस्त पाइपलाइनची तातडीने दुरुस्ती करणे आणि बाष्पीभवनामुळे होणारे पाण्याचे नुकसान कमी करण्यासाठी आवश्यक उपाययोजना कराव्यात,रानवली धरणातील पाणीसाठा सध्या ४५ टक्के असून, उपलब्ध पाणीसाठ्याचा जपून वापर करणे आवश्यक आहे. श्रीवर्धन शहरासह धरणावर अवलंबून असलेल्या ग्रामीण भागातील गावांना पुढील पावसाळ्यापर्यंत पुरेसा पाणीपुरवठा उपलब्ध व्हावा, यासाठी पाण्याच्या वापराचे नियोजनबद्ध व्यवस्थापन करावे. पाणीपुरवठा करणाऱ्या पाइपलाइनची तातडीने पाहणी करून गळती आढळणाऱ्या ठिकाणांची दुरुस्ती करावी. तसेच बाष्पीभवनामुळे होणारे पाण्याचे नुकसान कमी करण्यासाठी व्यवहार्य उपाययोजना राबवाव्यात. धरणातील पाणीसाठा दीर्घकाळ टिकवून ठेवण्यासाठी धरणातील गाळ काढण्याच्या कामाला प्राधान्य द्यावे. पाण्याचा अपव्यय टाळण्यासाठी संबंधित यंत्रणांनी समन्वयाने काम करून पाणीपुरवठा व्यवस्थेतील त्रुटी दूर कराव्यात. उपलब्ध पाणीसाठा आणि अपेक्षित पाण्याची गरज यांचा विचार करून पाणीवापराचे नियोजन करणे आवश्यक असल्याचेही मंत्री तटकरे यांनी स्पष्ट केले.

संभाव्य दुष्काळसदृश परिस्थितीत नागरिकांना पिण्याच्या पाण्याची टंचाई जाणवू नये, यासाठी संबंधित ग्रामपंचायती आणि नगरपरिषदेने समन्वयाने कार्यवाही करावी. ग्रामसभा आणि स्थानिक बैठकांच्या माध्यमातून नागरिकांमध्ये पाणी बचतीबाबत जनजागृती करावी. पाण्याचा काटकसरीने वापर, गळती रोखणे आणि उपलब्ध पाणीसाठ्याचे प्रभावी व्यवस्थापन यासाठी आवश्यक उपाययोजनांचा आराखडा तयार करून त्याची तातडीने अंमलबजावणी करावी, असे निर्देशही मंत्री आदिती तटकरे यांनी यावेळी दिले.

0000

श्रद्धा मेश्राम/विसंअ