संगमनेरमधील पाणीटंचाईवर कायमस्वरूपी उपाययोजना कराव्या – मंत्री गुलाबराव पाटील

मुंबई, दि. ७ : संगमनेर विधानसभा मतदारसंघातील पाणीटंचाईवर केवळ टँकरच्या माध्यमातून तात्पुरती उपाययोजना न करता उपलब्ध जलस्रोतांचा योग्य वापर, अपूर्ण पाणीपुरवठा योजनांची तातडीने पूर्तता आणि भविष्यातील गरजा लक्षात घेऊन कायमस्वरूपी नियोजन करण्याचे निर्देश पाणीपुरवठा व स्वच्छता मंत्री गुलाबराव पाटील यांनी दिले. संगमनेर विधानसभा मतदारसंघातील पाणीटंचाईचा आढावा मंत्री पाटील यांनी मंत्रालयात झालेल्या बैठकीमध्ये घेतला.

या बैठकीत मतदारसंघातील पाणीटंचाईची सद्यस्थिती, उपलब्ध जलस्रोत, पाणीपुरवठा योजना, टँकरद्वारे सुरू असलेला पाणीपुरवठा, जल जीवन मिशनअंतर्गत सुरू असलेली कामे तसेच भविष्यातील पाणीटंचाई टाळण्यासाठी आवश्यक उपाययोजनांचा सविस्तर आढावा घेण्यात आला. यावेळी आमदार अमोल खताळ, आमदार विठ्ठलराव लंघे-पाटील, आमदार आमश्या पाडवी, पाणीपुरवठा व स्वच्छता विभागाचे अपर मुख्य सचिव पराग जैन-नैनुटिया, जल जीवन मिशनच्या अतिरिक्त सह अभियान संचालक दीपाली देशपांडे-सावेडकर, अहिल्यानगर जिल्हा परिषदेचे मुख्य कार्यकारी अधिकारी आनंद भंडारी, महाराष्ट्र जीवन प्राधिकरणाचे अधिकारी, तसेच संगमनेर तालुका व अहिल्यानगर जिल्ह्यातील संबंधित अधिकारी उपस्थित होते.

टँकरऐवजी कायमस्वरूपी पाणीपुरवठ्यावर भर

पाणीटंचाईग्रस्त भागांसाठी केवळ टँकरने पाणीपुरवठा करून प्रश्न सुटणार नाही. प्रत्येक गावासाठी उपलब्ध जलस्रोत, पाणीपुरवठा व्यवस्था आणि भविष्यातील गरजांचा विचार करून व्यवस्थित अभ्यास व नियोजन करावे, असे निर्देश मंत्री पाटील यांनी दिले. आमदार तसेच अन्य लोकप्रतिनिधींनी मांडलेल्या स्थानिक सूचनांचा प्राधान्याने विचार करून त्यानुसार आवश्यक कार्यवाही केली जावी. २०१४-१५ आणि २०१७-१८ मध्ये निर्माण झालेल्या तीव्र पाणीटंचाईच्या काळात करण्यात आलेल्या उपाययोजनांचा अभ्यास करून त्यापैकी उपयुक्त असलेल्या उपाययोजना सध्याच्या परिस्थितीत राबवाव्यात, असेही मंत्री पाटील यांनी सांगितले.

जल जीवन मिशनच्या अपूर्ण योजना प्राधान्याने पूर्ण करण्याचे निर्देश

संगमनेर तालुक्यात जल जीवन मिशनअंतर्गत एकूण ७२ नळ पाणीपुरवठा योजना आहेत. त्यापैकी ४६ योजना प्रगतीपथावर असून, यातील ३६ योजनांची भौतिक प्रगती ७६ ते ९९ टक्क्यांदरम्यान आहे. या योजना प्राधान्याने पूर्ण केल्यास अनेक भागांतील टँकरवरील अवलंबित्व कमी होण्यास मदत होणार आहे. तसेच जल जीवन मिशनअंतर्गत संगमनेर तालुक्यातील नळ पाणीपुरवठा व घरगुती नळ जोडणी योजनांचा एकत्रित आढावा घेतल्यास २३० योजनांपैकी १४२ कामे प्रगतीपथावर असून ९३ कामे पूर्ण झाली आहेत. त्याचप्रमाणे जिल्हा परिषद किंवा महाराष्ट्र जीवन प्राधिकरणाच्या ज्या पाणीपुरवठा योजना अर्धवट आहेत, त्या तातडीने पूर्ण करण्याचे निर्देश मंत्री पाटील यांनी दिले.

पाणीपुरवठा योजनांच्या थकीत वीजबिलांचाही बैठकीत आढावा घेण्यात आला. वीज देयक थकीत असल्यामुळे कोणतीही पाणीपुरवठा योजना बंद राहता कामा नये, अशी स्पष्ट भूमिका मंत्री पाटील यांनी मांडली. भविष्यात अशा समस्या उद्भवू नयेत यासाठी पाणीपुरवठा योजनांना सौरऊर्जेचा कायमस्वरूपी पर्याय उपलब्ध करून देण्यासाठी प्राधान्याने प्रयत्न करावेत, असे निर्देश त्यांनी दिले.

जलस्रोत आणि चारा उपलब्धतेचेही नियोजन

उपलब्ध पाणी, जलस्रोत आणि चारा उपलब्धतेचा आढावा बैठकीमध्ये घेण्यात आला. पाणीटंचाईबरोबरच जनावरांसाठी चारा टंचाई निर्माण होणार नाही, याची दक्षता घेण्याच्या सूचना यावेळी देण्यात आल्या. पाणीटंचाईग्रस्त तसेच भविष्यात पाणीटंचाई निर्माण होण्याची शक्यता असलेल्या भागात आवश्यक अधिकारी व कर्मचारी उपलब्ध आहेत की नाही, याची खात्री करून रिक्त पदे राहणार नाहीत, याबाबतही दक्षता घेण्याचे निर्देश मंत्री पाटील यांनी दिले.

संगमनेरमधील १९ जल जीवन मिशन योजनांमध्ये ४६ गावे समाविष्ट असून, टंचाई आराखड्यात ९ योजना आणि ४६ गावे समाविष्ट आहेत. ४ गावांना टँकरद्वारे पाणीपुरवठा सुरू असल्याची माहिती महाराष्ट्र जीवन प्राधिकरणाच्या अधिकाऱ्यांनी बैठकीत दिली. मुळा धरणावरील उपलब्ध पाणीसाठ्याच्या आधारे वरवंडी व अन्य चार गावांच्या प्रादेशिक पाणीपुरवठा योजनेचा आढावाही यावेळी घेण्यात आला. या योजनेची भौतिक प्रगती ८५ टक्के असून, उर्वरित कामे पूर्ण करून संबंधित गावांचा पाणीप्रश्न कायमस्वरूपी सोडविण्याचे निर्देश मंत्री पाटील यांनी दिले.

पुढील काळात पाणीटंचाईच्या परिस्थितीवर प्रशासनाने अत्यंत सजगतेने लक्ष ठेवावे. सामान्य नागरिकांना पाण्यासाठी कोणत्याही प्रकारची अडचण निर्माण होणार नाही, याची सर्व संबंधित विभागांनी दक्षता घ्यावी. विभागांमध्ये समन्वय ठेवून तातडीच्या उपाययोजनांसोबतच दीर्घकालीन आणि शाश्वत पाणीपुरवठ्याचे नियोजन करावे, असे निर्देश मंत्री पाटील यांनी यावेळी दिले.

0000