स्वीडनच्या उद्योजकांनी महाराष्ट्रात उद्योग उभारावे – मंत्री जयकुमार रावल
- कृषी व दुग्धव्यवसाय क्षेत्रातील सहकार्य वाढविण्यावर भर
मुंबई, दि. १२ : स्वीडनमधील प्रगत तंत्रज्ञान आणि महाराष्ट्राची उत्पादन क्षमता यांची सांगड घालून स्वीडनच्या उद्योजकांनी राज्यात आधुनिक तंत्रज्ञानाधारित उद्योग उभारावेत. मुंबई-पुण्याबरोबरच महाराष्ट्रातील इतर भागांतही गुंतवणूकदारांनी पुढे यावे. त्यांना आवश्यक त्या सर्व सोयी-सुविधा उपलब्ध करून देण्यात येतील, असे आश्वासन राजशिष्टाचार मंत्री जयकुमार रावल यांनी दिले.
स्वीडनच्या राजदूत मिस पेट्रा मेनांडर यांनी मुंबई भेटी दरम्यान सह्याद्री अतिथीगृह येथे मंत्री जयकुमार रावल यांची सदिच्छा भेट घेतली. यावेळी महाराष्ट्र आणि स्वीडन यांच्यातील औद्योगिक गुंतवणूक, संरक्षण उत्पादन, एरोस्पेस, कृत्रिम बुद्धिमत्ता, कृषी व दुग्धव्यवसाय क्षेत्रांतील सहकार्याबाबत चर्चा झाली. पुणे ते नाशिकदरम्यान स्वीडिश कंपन्यांसाठी औद्योगिक समूह विकसित करून आवश्यक पायाभूत सुविधा व निवासव्यवस्था उपलब्ध करण्याच्या शक्यतेवर यावेळी विचारविनिमय झाला. यामुळे राज्यातील विविध भागांत औद्योगिक विकासाच्या नव्या संधी निर्माण होतील, असे मंत्री रावल यांनी नमूद केले.
स्वीडनमधील आधुनिक तंत्रज्ञानाचा महाराष्ट्रातील उद्योगांमध्ये वापर वाढविणे, कौशल्य आणि तंत्रज्ञान हस्तांतरणातून स्थानिक उत्पादन क्षमता व मूल्यवर्धनाला चालना देणे, तसेच आधुनिक दुग्धव्यवसाय तंत्रज्ञानाचा राज्यातील शेतकऱ्यांना लाभ मिळवून देणे यावरही यावेळी चर्चा झाली. त्याचबरोबर, दोन्ही देशांतील विद्यार्थी, संशोधक व शेतकरी यांच्यात अनुभवांची देवाणघेवाण वाढविण्याबाबत विचारविनिमय करण्यात आला.
महाराष्ट्र आणि स्वीडन यांच्यातील औद्योगिक संबंध अधिक दृढ करून राज्यात गुंतवणुकीच्या नव्या संधी निर्माण करण्यावर तसेच सांस्कृतिक देवाण-घेवाण वाढविण्यावर यावेळी चर्चा करण्यात आली.
0000
बी.सी.झंवर/विसंअ
