
छत्रपती संभाजीनगर, दि. २२ (जिमाका): महाराष्ट्र संशोधन, उन्नती व प्रशिक्षण प्रबोधिनी (अमृत) यांच्या वतीने ‘अमृत दुर्गोत्सव २०२६’ हा अभिनव उपक्रम राबविण्यात येत आहे. या उपक्रमात दि.३० पर्यंत सहभागाची संधी असल्याने नागरिकांनी सहभागी व्हावे असे आवाहन करण्यात आले आहे.
दिवाळीच्या काळात लहान मुलांपासून ज्येष्ठांपर्यंत सर्वजण उत्साहाने गड-किल्ल्यांच्या प्रतिकृती तयार करतात. या परंपरेतून कलात्मकतेला वाव मिळण्यासोबतच छत्रपती शिवाजी महाराजांचा पराक्रम, गनिमी काव्याचे युद्धतंत्र, स्वराज्याची संकल्पना आणि दुर्गसंवर्धनाचे महत्त्वही अधोरेखित होते. हा ऐतिहासिक वारसा अधिक व्यापक स्वरूपात जतन करण्याच्या उद्देशाने ‘अमृत दुर्गोत्सव २०२६’चे आयोजन करण्यात आले आहे.
छायाचित्र अपलोड करून सहभागी व्हा
या उपक्रमात सहभागी होण्यासाठी नागरिकांनी स्वतः तयार केलेल्या गड-किल्ल्याच्या प्रतिकृतीचे छायाचित्र किंवा प्रतिकृतीसोबतचा सेल्फी काढून www.amrutdurgotsav.com या अधिकृत संकेतस्थळावर अपलोड करावा. सहभागासाठी नोंदणीची अंतिम मुदत दि.३०आहे. उपक्रमात सहभागी होणाऱ्या प्रत्येक नागरिकाला मुख्यमंत्री देवेंद्र फडणवीस यांच्या स्वाक्षरीचे डिजिटल अभिनंदनपत्र प्रदान करण्यात येणार आहे.
गिनीज बुकमध्ये नोंदीसाठी प्रयत्न
या उपक्रमाचे आणखी एक वैशिष्ट्य म्हणजे नागरिकांनी साकारलेल्या गड-किल्ल्यांच्या प्रतिकृतींच्या छायाचित्रांची ‘गिनीज बुक ऑफ वर्ल्ड रेकॉर्डस’ मध्ये नोंद व्हावी, यासाठी प्रयत्न करण्यात येणार आहेत. त्यामुळे हा उपक्रम केवळ सांस्कृतिक उत्सव न राहता महाराष्ट्राच्या ऐतिहासिक वैभवाची जागतिक स्तरावर ओळख निर्माण करण्याची संधी ठरणार आहे.
शाळा-महाविद्यालयांतील विद्यार्थी, तरुण, पालक, शिक्षक, सामाजिक संस्था, गृहनिर्माण सोसायट्या आणि राज्यातील सर्व नागरिकांनी या उपक्रमात उत्स्फूर्तपणे सहभागी व्हावे. आपल्या कल्पकतेतून गड-किल्ल्यांच्या प्रतिकृती साकारून छत्रपती शिवाजी महाराजांचा इतिहास पुढील पिढीपर्यंत पोहोचवावा, असे आवाहन करण्यात आले आहे.
गड-किल्ले हे केवळ दगड-मातीचे बांधकाम नसून महाराष्ट्राच्या शौर्याचे, स्वाभिमानाचे आणि स्वराज्याच्या गौरवशाली इतिहासाचे प्रतीक आहेत. या ऐतिहासिक वारशाचे जतन व संवर्धन करण्यासाठी प्रत्येकाने योगदान द्यावे. ‘अमृत दुर्गोत्सव २०२६’च्या माध्यमातून शिवशौर्याचा जागर राज्यभर घडविण्यासाठी नागरिकांनी मोठ्या संख्येने सहभागी व्हावे,असे आवाहन करण्यात आले आहे.
००००

