
धुळे, दि. 22: दुष्काळी परिस्थितीत पशुधनासाठी हिरव्या चाऱ्याची उपलब्धता सुनिश्चित करण्यासाठी वैरण विकास योजना महत्त्वपूर्ण ठरणार आहे. या योजनेच्या माध्यमातून स्थानिक पातळीवर चारा उत्पादन वाढवून पशुपालकांना दिलासा देण्याचा प्रयत्न आहे. पशुपालकांनी उपलब्ध पाण्याचे योग्य नियोजन करून वैरण पिकांची लागवड करावी आणि दुग्ध व्यवसायाच्या माध्यमातून आर्थिक उत्पन्न वाढवावे, असे आवाहन राज्याचे पणन व राजशिष्टाचार मंत्री तथा धुळे जिल्ह्याचे पालकमंत्री जयकुमार रावल यांनी केले.

शिंदखेडा तालुक्यातील मौजे विखरण येथे जिल्हा वार्षिक योजनेअंतर्गत आयोजित कार्यक्रमात पालकमंत्री जयकुमार रावल यांच्या हस्ते पशुपालकांना मका व ज्वारीच्या वैरण बियाण्यांचे वाटप करण्यात आले. यावेळी उपस्थित पशुपालकांना मार्गदर्शन करताना ते बोलत होते.
पालकमंत्री जयकुमार रावल म्हणाले की, शेतीबरोबरच पशुपालन हा ग्रामीण अर्थव्यवस्थेचा महत्त्वाचा आधार आहे. मात्र, दुष्काळाच्या काळात चाऱ्याच्या टंचाईमुळे पशुपालकांना अनेक अडचणींचा सामना करावा लागतो. या पार्श्वभूमीवर जनावरांच्या चाऱ्याचे नियोजन करणे आवश्यक आहे. मका व ज्वारीसारख्या वैरण पिकांच्या लागवडीतून हिरव्या चाऱ्याची उपलब्धता वाढविता येते. पौष्टिक चाऱ्यामुळे जनावरांचे आरोग्य चांगले राहण्यासह दूध उत्पादन टिकविण्यास मदत होते. त्यामुळे पशुपालकांनी वैरण विकास योजनेचा प्रभावीपणे लाभ घ्यावा.

दुग्ध व्यवसाय हा शेतकरी कुटुंबांसाठी नियमित उत्पन्नाचा महत्त्वाचा स्रोत आहे. सुधारित पशुपालन पद्धती, चाऱ्याचे योग्य व्यवस्थापन आणि उपलब्ध साधनसंपत्तीचा कार्यक्षम वापर यावर भर दिल्यास हा व्यवसाय अधिक फायदेशीर होऊ शकतो. पशुपालकांनी पारंपरिक शेतीला दुग्ध व्यवसायाची जोड देऊन आर्थिक प्रगती साधावी, असेही पालकमंत्री जयकुमार रावल यांनी सांगितले.
वैरण बियाणे वाटपातून चारा उत्पादनाला प्रोत्साहन
जिल्हा वार्षिक योजनेअंतर्गत राबविण्यात येणाऱ्या या उपक्रमाचा उद्देश पशुपालकांना वैरण पिकांच्या लागवडीस प्रोत्साहन देऊन गावपातळीवर चाऱ्याची उपलब्धता वाढविणे हा आहे. विशेषतः टंचाईच्या काळात पशुधनाच्या संगोपनासाठी आवश्यक चाऱ्याची व्यवस्था होण्यास या उपक्रमाची मदत होणार आहे.

या कार्यक्रमास दोंडाईचा कृषी उत्पन्न बाजार समितीचे सभापती नारायण पाटील, शिंदखेडा पंचायत समितीचे माजी सभापती जिजाबराव पाटील, भाजपचे जिल्हा डी. एस. गिरासे, जिल्हा परिषदेचे माजी सदस्य पंकज कदम, भूपेंद्र गिरासे, जिल्हा परिषदेचे माजी सभापती धनंजय मंगळे, शिंदखेडा पंचायत समितीचे माजी सभापती रणजित गिरासे, उद्योजक रमेश टाटिया, विखरणचे सरपंच महेंद्र पवार, माजी सरपंच हिरामण तायडे, विठ्ठल पाटील, उपसरपंच रमेश पाटील, सत्यजित गिरासे, सोनशेलूचे सरपंच धीरज बडगुजर, कामपूरचे सरपंच विष्णू पाटील यांच्यासह पंचक्रोशीतील पदाधिकारी, शेतकरी व पशुपालक उपस्थित होते.

कार्यक्रमाच्या यशस्वी आयोजनासाठी जिल्हा उपायुक्त पशुसंवर्धन व दुग्ध व्यवसाय डॉ. गिरीश पाटील, शिंदखेडा पंचायत समितीचे गटविकास अधिकारी रमेश नेतनराव, तालुका पशुधन विकास अधिकारी डॉ. भूषण वाकडे, सहाय्यक उपायुक्त डॉ. साळुंखे, विखरणच्या पशुधन विकास अधिकारी डॉ. रूपाली काटे, श्री. राजभोज, सोहनलाल राठोड, नरहर पाटील, अनिल लोहार, अमित नजन, गुलजारसिंग गिरासे, योगेश जाधव, गौरव फटकाळ, निलेश पाचपोळ, संतोष उगलमुगले, ओमप्रकाश सोनवणे, संजय पाटील, पांडुरंग चव्हाण, नंदकिशोर पाटील व कुरेशी शेख यांनी परिश्रम घेतले.
००००

