मालेगावच्या आरोग्य व्यवस्थेला नवी दिशा; मालेगाव पॅटर्न राज्यभर राबविण्याचा प्रयत्न करणार – मंत्री प्रकाश आबिटकर

मालेगाव (नाशिक), दि. २१ : मालेगाव शहरातील शासकीय व महानगरपालिका रुग्णालयांमध्ये उपलब्ध आरोग्य सुविधांचे बळकटीकरण करण्यासाठी आवश्यक मनुष्यबळ, विशेष तज्ज्ञ डॉक्टर तसेच अत्याधुनिक वैद्यकीय उपकरणे उपलब्ध करून देण्यास प्राधान्य दिले जाईल. मालेगावमध्ये विकसित होत असलेल्या आरोग्य व्यवस्थेचा ‘मालेगाव पॅटर्न’ राज्यातील ग्रामीण व जिल्हा रुग्णालयांसाठी आदर्श ठरावा, यासाठी प्रयत्न करण्यात येतील, असे प्रतिपादन आरोग्यमंत्री प्रकाश आबिटकर यांनी केले.

मालेगाव येथील क्रांतीज्योती सावित्रीबाई फुले महिला व बाल रुग्णालय येथे आयोजित आढावा बैठकीत राज्याचे सार्वजनिक आरोग्य व कुटूंब कल्याण मंत्री प्रकाश आबिटकर बोलत होते. यावेळी शालेय शिक्षण मंत्री दादाजी भुसे, मालेगाव नगरपालिकेच्या उपमहापौर शाने हिंद निहाल अहमद, आरोग्य उपसंचालक डॉ. कपिल आहेर, जिल्हा शल्यचिकित्सक डॉ. सतीश शिंपी, वैद्यकीय अधीक्षक (वर्ग-१) जितेंद्र डोलारे, अतिरिक्त जिल्हा शल्यचिकित्सक डॉ. अनिस मोमीन, जिल्हा आरोग्य अधिकारी सुधाकर मोरे, निवासी वैद्यकीय अधिकारी संदीप सूर्यवंशी, निवासी वैद्यकीय अधिकारी डॉक्टर बाळू पाटील (बाह्य संपर्क विभाग) डॉ. आनंद पवार, मालेगाव महानगरपालिकेच्या सहाय्यक आरोग्य अधिकारी डॉ. जयश्री आहेर, प्रजनन व बाल संगोपन अधिकारी डॉ. अलका भावसार, बालरोग तज्ज्ञ डॉ. बी. बी. फातिमा अन्सारी, क्षयरोग अधिकारी डॉ. ऋषिकेश साळुंखे, डॉ. प्रवीण पाटील, उपायुक्त (महिला व बालकल्याण) पल्लवी शिरसाट यांच्यासह संबंधित अधिकारी व आरोग्य कर्मचारी उपस्थित होते.

मंत्री आबिटकर म्हणाले, मालेगावमधील रुग्णालयांची व्यवस्था, स्वच्छता आणि उपलब्ध सुविधांचे काम समाधानकारक आहे. यापूर्वी बारामती येथील प्राथमिक आरोग्य केंद्रांमध्ये विकसित करण्यात आलेल्या सुविधांचा चांगला नमुना पाहायला मिळाला. त्याच धर्तीवर मालेगावमध्येही आरोग्य सुविधांचे चांगले व्यवस्थापन करण्यात आले आहे. त्यामुळे मालेगावचा हा पॅटर्न राज्यातील ग्रामीण रुग्णालये व जिल्हा रुग्णालयांमध्ये राबविण्याचा प्रयत्न करण्यात येईल. मालेगावच्या रुग्णालयांसाठी आवश्यक मनुष्यबळ व सुधारित आकृतिबंधाबाबत आलेल्या मागण्यांवर आरोग्य विभागाच्या स्तरावर कार्यवाही करण्यात येत आहे. संबंधित अधिकाऱ्यांनी आवश्यक प्रस्ताव व कृती आराखडा तयार करून सदर करावा. विशेष तज्ज्ञ डॉक्टर, आवश्यक मनुष्यबळ, एमआरआय, सीटी स्कॅन, दंतचिकित्सा, कान-नाक-घसा विभाग तसेच इतर आवश्यक वैद्यकीय उपकरणांबाबत प्राप्त मागण्यांचा प्राधान्याने विचार करण्यात येईल, असे त्यांनी सांगितले.

नागरिकांना उपचारासाठी इतर शहरांमध्ये जावे लागू नये, यासाठी आवश्यक त्या आरोग्य सुविधा मालेगावमध्येच उपलब्ध करून देण्यावर भर देण्यात येईल. महानगरपालिकेच्या अखत्यारितील रुग्णालयांमध्ये मनुष्यबळ उपलब्ध करून देताना येणाऱ्या प्रशासकीय अडचणी नगरविकास विभागाशी समन्वय साधून सोडविण्यात येतील. रुग्णालयाची इमारत आणि उपकरणांबरोबरच रुग्णांना मिळणारी सेवा आणि रुग्णालयातील वातावरणही महत्त्वाचे आहे. रुग्णांना आपुलकी, समाधान व विश्वासाची भावना मिळाली पाहिजे. डॉक्टर, परिचारिका व कर्मचाऱ्यांनी सेवाभावाने काम करून रुग्णकेंद्रित आरोग्य व्यवस्था निर्माण करावी, शासकीय आरोग्य संस्थांच्या प्रभावी कामकाजासाठी लोकसहभाग महत्त्वाचा असल्याचे मंत्री आबिटकर यांनी सांगितले. रुग्ण कल्याण समित्या, लोकप्रतिनिधी आणि आरोग्य विभागातील अधिकारी यांच्यात नियमित समन्वय असावा. दर तीन महिन्यांनी संबंधित लोकप्रतिनिधींच्या उपस्थितीत रुग्णालयांच्या कामकाजाचा आढावा घेऊन अडचणी व आवश्यक सुधारणांवर चर्चा करावी, अशा सूचना त्यांनी दिल्या.

मालेगावच्या आरोग्य सुविधांसाठी आवश्यक मनुष्यबळ व वैद्यकीय साहित्य उपलब्ध करून मिळावे – मंत्री दादाजी भुसे

मालेगाव महानगरपालिकेच्या अंतर्गत रुग्णालयासाठी जवळपास १०० खाटांची नवीन इमारत पूर्णत्वास आली असून, हे रुग्णालय पूर्ण क्षमतेने सुरू करण्यासाठी सुधारित आकृतिबंधानुसार वर्ग-१ अधिकारी, विशेष तज्ज्ञ डॉक्टर तसेच आवश्यक मनुष्यबळ उपलब्ध करून द्यावे, अशी मागणी शालेय शिक्षण मंत्री दादाजी भुसे यांनी केली.

या रुग्णालयासाठी सोनोग्राफी मशीन, एक्स-रे मशीन, ॲनेस्थेशिया वर्कस्टेशन तसेच इतर आवश्यक वैद्यकीय उपकरणे व साहित्य उपलब्ध करून देण्याची मागणीही त्यांनी केली. तसेच मालेगाव महानगरपालिकेच्या माध्यमातून आणखी एक सुमारे १०० खाटांचे रुग्णालय प्रगतिपथावर असून, तेही लवकरात लवकर नागरिकांच्या सेवेत आणण्यासाठी आवश्यक कार्यवाही करावी. अल्पसंख्याक समाजाच्या माध्यमातून उभारण्यात आलेले सुमारे ५० खाटांचे रुग्णालय पुढील दीड महिन्यात कार्यान्वित करण्याचे नियोजन आहे.

मालेगावच्या सामान्य रुग्णालयात सध्या २०० खाटांची सुविधा असून, आणखी १०० खाटांचे बांधकाम प्रगतिपथावर आहे. त्यामुळे रुग्णालयाची क्षमता ३०० खाटांपर्यंत वाढणार असून, त्यासाठी वर्ग-१ अधिकारी, वैद्यकीय अधिकारी आणि विविध विषयांतील विशेष तज्ज्ञ डॉक्टरांची आवश्यकता असल्याचे मंत्री भुसे यांनी निदर्शनास आणून दिले. रुग्णालयासाठी एमआरआय मशीन, दंतचिकित्सा विभागासाठी आवश्यक उपकरणे तसेच कान-नाक-घसा विभागासाठी आवश्यक साहित्य उपलब्ध करून द्यावे. महिला व बाल रुग्णालयातील स्त्रीरोग तज्ज्ञ डॉक्टरांच्या उपलब्धतेबाबतही भुसे यांनी आरोग्यमंत्र्यांचे लक्ष वेधले.

मालेगाव सामान्य रुग्णालयास मंत्री आबिटकर यांची भेट

मालेगाव येथील सामान्य रुग्णालयास मंत्री आबिटकर यांनी भेट देऊन पाहणी केली. यावेळी त्यांनी रुग्णांशी संवाद साधत त्यांच्या समस्या जाणून घेतल्या. यावेळी मातांना बेबी केअर कीटचे व बालकांचे जन्म प्रमाणपत्र यांचे वाटप मंत्री महोदयांच्या हस्ते करण्यात आले.

वडाळी भोई येथील प्राथमिक आरोग्य केंद्रास सार्वजनिक आरोग्य मंत्री श्री आबिटकर यांची भेट व पाहणी

मंत्री आबिटकर यांनी चानवड तालुक्यातील वडाळी भोई येथील प्राथमिक आरोग्य केंद्रास भेट देऊन पाहणी केली. यावेळी आमदार डॉ. राहुल आहेर  आरोग्य उपसंचालक डॉ. कपिल आहेर, जिल्हा शल्यचिकित्सक डॉ. सतीश शिंपी, जिल्हा आरोग्य अधिकारी सुधाकर मोरे, निवासी वैद्यकीय अधिकारी संदीप सूर्यवंशी, निवासी वैद्यकीय अधिकारी डॉक्टर बाळू पाटील (बाह्य संपर्क विभाग), वैद्यकीय अधिकारी डॉ. सुलोचना भोये, तालुका आरोग्य अधिकारी डॉ हेमंत अहिरराव यांच्यासह अधिकारी उपस्थित होते. मंत्री आबिटकर यांनी प्राथमिक आरोग्य केंद्रातील सुविधा, कामकाज व स्वच्छता याबाबत कौतुक केले व आरोग्य अधिकारी व कर्मचाऱ्यांना शुभेच्छा दिल्या.

००००