‘सेवा संकल्प अभियाना’त दाखले, प्रमाणपत्रांसह योजनांचे नागरिकांना मार्गदर्शन

मुंबई, दि. ८ :  शासकीय सेवा अधिक सुलभ आणि नागरिकाभिमुख करण्याच्या उद्देशाने राबविण्यात येत असलेल्या ‘सेवा संकल्प अभियाना’अंतर्गत बृहन्मुंबई महानगरपालिकेच्या ‘बी’ विभाग कार्यालयात आयोजित ‘महाराजस्व शिबिराला’ नागरिकांचा उत्स्फूर्त प्रतिसाद लाभला. या महाराजस्व शिबिरात परिसरातील नागरिकांनी विविध शासकीय सेवांचा लाभ घेत एकाच छताखाली विविध विभागांच्या सेवा उपलब्ध झाल्याबद्दल समाधान व्यक्त केले.

मुंबई शहर जिल्हाधिकारी कार्यालय व महानगरपालिका प्रशासनाच्या संयुक्त विद्यमाने ‘बी’ विभाग कार्यालयामध्ये या शिबिराचे आयोजन करण्यात आले. या कार्यक्रमात मान्यवरांच्या हस्ते लाभार्थीना विविध प्रमाणपत्राचे वाटप करण्यात आले.  यावेळी मुंबई शहर जिल्हाधिकारी कार्यालयाच्या निवासी उपजिल्हाधिकारी डॉ. शिवनंदा लंगडापुरे, महानगरपालिकेचे सहाय्यक आयुक्त जितेंद्र बोराडे व उज्वल इंगोले, तहसीलदार डॉ. मानसी मार्लेवार व तनुजा वडनेरे यांच्यासह जिल्हाधिकारी कार्यालय व महानगरपालिकेचे अधिकारी-कर्मचारी आणि लाभार्थी नागरिक उपस्थित होते.

या महाराजस्व अभियानात विविध शासकीय दाखले, प्रमाणपत्रे आणि योजनांसंदर्भातील प्रलंबित कामे मार्गी लागावीत, नागरिकांच्या वेळेची बचत व्हावी  यासाठी प्रशासनाने विशेष व्यवस्था केली. महाराजस्व शिबिरात ज्येष्ठ नागरिकांचा सहभाग मोठा होता. तर विविध सेवांसाठी स्वतंत्र कक्ष करण्यात आले होते.

संजय गांधी निराधार योजना तसेच महिला व बालविकास विभागाच्या विविध कल्याणकारी योजनांची माहिती नागरिकांना देण्यात आली. पात्र लाभार्थ्यांना संबंधित योजनांचा लाभ मिळवून देण्यासाठी आवश्यक मार्गदर्शनही करण्यात आले. त्यामुळे केवळ दाखले आणि प्रमाणपत्रांपुरते मर्यादित न राहता विविध शासकीय योजनांची माहितीही नागरिकांना एकाच ठिकाणी मिळाली. शासकीय यंत्रणा थेट नागरिकांपर्यंत पोहचल्याची भावना नागरिकांनी व्यक्त केली. सेवा देताना सुलभता, पारदर्शकता आणि तत्परतेवर भर दिल्याबद्दल नागरिकांनी प्रशासनाचे आभार मानले.

सेवा संकल्प अभियानांतर्गत राबविण्यात आलेल्या या महाराजस्व शिबिरात नागरिकांना मार्गदर्शन करण्यात आले. यावेळी शिधापत्रिकांचे वितरण, जन्म नोंदणी प्रमाणपत्र, विवाह नोंदणी प्रमाणपत्र, आधारकार्ड, दिव्यांग प्रमाणपत्र सेवांचा समावेश होता. तसेच मालमत्ता हस्तांतरणाची नोंद, मालमत्ता कराची आकारणी व मागणीपत्र, नळजोडणी, जन्म-मृत्यू नोंदणी व प्रमाणपत्र यासारख्या महापालिकेशी संबंधित सेवाही उपलब्ध करून देण्यात आल्या. वीज जोडणीस मंजुरी, मालमत्ता हस्तांतरणानंतर वीज जोडणीच्या नोंदीत नवीन मालमत्ताधारकाचे नाव समाविष्ट करणे, प्रादेशिक परिवहन  संबंधित सेवा तसेच जमिनीच्या नोंदी व मोजणीसंबंधी कामांसाठीही संबंधित विभागांचे अधिकारी उपस्थित होते. नगर भूमापन व भूमी अभिलेख, बृहन्मुंबई महानगरपालिका, बेस्ट, आरटीओ, सामान्य प्रशासन, सामाजिक न्याय आणि नोंदणी विभागाच्या सेवांचा नागरिकांना या उपक्रमातून लाभ देण्यात आला.

निवासी उपजिल्हाधिकारी डॉ. शिवनंदा लंगडापुरे, सहाय्यक आयुक्त जितेंद्र बोराडे व उज्ज्वल इंगोले यांनी प्रत्येक कक्षास भेट देऊन नागरिकांना देण्यात येत असलेल्या सेवांची पाहणी केली.

००००

एकनाथ पोवार/स.सं.