
नांदेड, दि. २१ : भारतरत्न डॉ. बाबासाहेब आंबेडकर यांच्या ‘शिका, संघटित व्हा आणि संघर्ष करा’ या विचारांचा अंगीकार करून आदिवासी युवकांनी उच्च शिक्षण घेऊन समाजाच्या विकासात योगदान द्यावे. शासनाच्या विविध शैक्षणिक व कल्याणकारी योजनांचा लाभ घेऊन प्रगती साधावी, असे आवाहन राज्याचे अन्न व औषध प्रशासन, विशेष सहाय मंत्री नरहरी झिरवाळ यांनी केले.
क्रांतीसूर्य धरती आबा भगवान बिरसा मुंडा यांच्या जयंतीनिमित्त आयोजित जनजातीय गौरव सप्ताहांतर्गत किनवट तालुक्यातील जलधारा आणि हिमायतनगर तालुक्यातील वाळकेवाडी येथे आयोजित जनसंवाद मेळाव्यात ते बोलत होते.
भगवान बिरसा मुंडा यांचे बलिदान, संघर्ष आणि समाजासाठीचे योगदान प्रेरणादायी आहे. त्यांच्या विचारांचा वारसा पुढे नेण्याचा संकल्प युवकांनी करावा. आदिवासी समाजातील प्रत्येक घटक शिक्षित होण्यासाठी शासन विविध योजना राबवत आहे. त्यांचा लाभ घ्यावा. सध्याची दुष्काळी परिस्थिती आणि ऑगस्ट २०२७ पर्यंत कमी पर्जन्यमानाचा अंदाज लक्षात घेता शासन नागरिकांच्या मदतीसाठी कटिबद्ध असून, कोणत्याही अडचणीच्या काळात आवश्यक मदत कमी पडू दिली जाणार नाही, अशी ग्वाहीही मंत्री झिरवाळ यांनी दिली.
जलधारा येथील कार्यक्रमास आमदार भीमराव केराम, जयवंत वानोळे, सरपंच वैशालीताई पाचपुते, तहसीलदार शारदा चोंडेकर, तर वाळकेवाडी येथील कार्यक्रमास आमदार बाबूराव कदम कोहळीकर, जयवंत वानोळे, तहसीलदार पल्लवी टेमकर, गटविकास अधिकारी यांच्यासह पदाधिकारी व अधिकारी उपस्थित होते. दोन्ही ठिकाणी संबंधित आमदारांनी मनोगत व्यक्त केले.
जलधारा येथे मंत्री नरहरी झिरवाळ यांच्या हस्ते भगवान बिरसा मुंडा यांच्या स्मारकाचे भूमिपूजन करण्यात आले. पारंपरिक वेशभूषेतील आदिवासी बांधवांनी नृत्य सादर करून त्यांचे स्वागत केले. वाळकेवाडी येथे त्यांनी भगवान बिरसा मुंडा यांच्या पूर्णाकृती पुतळ्यास पुष्पहार अर्पण करून अभिवादन केले. दोन्ही कार्यक्रमांना नागरिकांची मोठ्या संख्येने उपस्थिती होती.
००००

